Төрөөбүт төрүт тыл уонна сурук-бичик күнүгэр Саха сиринээҕи дьыктаан суруйуутун аахсыйатыгар кыттыстыбыт.
Тэрээһини олохтоох бибилэтиэкэ ситимэ иилээтэ, үгүс тэрилтэ кэлэктииптэрэ кыттыыны ыллылар. Дьыктааны саха тылын учутала Елена Афанасьевна Горохова дорҕоонноохтук аахта. Дьыктаан олоҥхоҕо туһаайыылаах буолла. Аны бэрэбиэркэ кэннэ, ким — хайдах таба суруйбутун түмүгүн долгуйа күүттүбүт. Маны тэҥэ, култуура дьиэтигэр хоһоон айан суруйааһына, олоҥхоттон быһа тардан ааҕыы, оһуохай ааттааҕа буолла. ,,Аартык» бөлөх эбээлэрэ эдэр дьону көҕүлээн, иэйиилэрэ уһуктан бэртээхэй хоһооннору айдылар, оһуохайдаан сэгэйдилэр.
Уопс. кэрр. Тамара Шадрина.