Улуус киинигэр Саккырыырга Кустуур нэһилиэгин баһылыга Роберт Колесов кэлэ сылдьарын түбэһэн, нэһилиэк олоҕуттан сырдатарыгар көрдөстүбүт.
“Бу күһүн тааралаах уматыкка сайаапка биэрбиппит. Иэспит-кууспут суох, онон, уматыкпыт кэлэрэ буоллар диэн эрэнэбит. Уопсайа 5 контейнер бензин, ол эбэтэр 41 туонна уонна 1 контейнер сэлээркэ, о.э. 11 туонна кэлиэхтээх. Бу кэлэр кээмэй сыл устата тиийиэхтээх диэн суоттуубут. Урукку дьылларга сэлээркэни ыла иликпит, быйыл дьэ саҥа ылан эрэбит.
Быйыл «Олохтоох көҕүлээһиннэри өйүүр бырагыраама” нөҥүө куонкуруска кыайбыт бырайыакпыт – оҕо оонньуур былаһаакката тутуллуохтаах. Сотору аукциону биллэриэхпит.
Сайыҥҥы өттүгэр бөһүөлэк иһинээҕи суолларга үлэлэһэр былааннаахпыт. Сотору эмиэ аукцион тахсыаҕа.
Тутулла турар саҥа хочуолунайбытыгар кулун тутар, муус устар ыйдарга үлэһиттэр кэлэннэр, аны күһүн үлэҕэ киирэн, нэһилиэккэ ититии 100 бырыһыан киириэхтээх.
Станциябыт саҥа фундамеҥҥа көһүөхтээх, ол үлэтэ билигин барар турар. Анал үлэһиттэр кэлэннэр фундамены оҥорууну бүтэрэн эрэллэр. Кулун тутар ыйга эбии үлэһиттэр кэлэннэр, кыраанынан дьиэтин, тэрилин көһөрүөхтэрэ”, — диэн Роберт Афанасьевич кэпсээтэ.
Сардаана Копырина