Улуустааҕы оҕо саас киинин «Маранга” уруһуй устуудьуйатын уһуйааччыта Мир Слепцов педагогическай үлэтин 25 сылыгар анаммыт “Кустук сэттэ өҥүгэр – айар үлэм ыллыга” уус-уран киэһэтэ Оҕо саас киинигэр үгүс көрөөччүнү түмтэ.
СӨ үөрэҕириитин туйгуна, үрдүк категориялаах уһуйааччы, Эбээн-Бытантай улууһун баһылыгын Гранын кыайыылааҕа Мир Николаевич салайар куруһуога 2004 сыллаахха тэриллибитэ. Онтон ыла кини куруһуогар киһи ааҕан сиппэт элбэх оҕо сырыттаҕа, олортон уруһуй кэрэ алыбыгар уйдаран талааннарын арыйбыт оҕолор улаатан бэйэлэрэ оҕолору уһуйар учуутал, худуоһунньук буолан үлэлии-хамныы сылдьаллар.
Бу бэлиэ күҥҥэ анаан Мир Николаевич оҕолорун уруһуйдарын быыстапка оҥорон дьон көрүүтүгэр-истиитигэр таһаарда. Манна бааллар эбит араас кэрэ көстүүлэр, хаартыскаҕа түһэриллибит кэриэтэ уруһуйдаммыт дьоннор мэтириэттэрэ, ханныктаах да түмэл быыстапкаларыгар турар хартыыналарга тэҥнэһэр кэрэ уруһуйдары киһи көрөн астынар, сэргиир, оҕолорбут дьоҕурдарын сөҕөр-махтайар.
Дьоро күҥҥэ айылҕаттан талааннаах, ураты дьоҕурдаах уһуйааччыны Түгэһиир нэһилиэгин баһылыга Сергей Аликов, үөрэҕирии салалтатын сүрүн исписэлииһэ Люциана Горохова, “Гарпан” ЭКК дириэктэрэ Раиса Старостина, оҕо уһуйаанын сэбиэдиссэйэ Марина Верховская итиитик-истиҥник эҕэрдэлээтилэр, сэмэй бэлэхтэрин туттардылар.
Салгыы кэлбит дьоҥҥо анаан сүрдээх үчүгэй, интэриэһинэй маастар- кылаас буолла, бу кэмҥэ бары бэйэлэрин уруһуйдьут, худуоһунньук оруолларыгар холонон көрдүлэр.
Бэлиэтээн эттэххэ, быйыл Эбээн Бытантай национальнай улууһа тэриллибитэ 35 сылын иитинэн тэрээһиннэр чэрчилэринэн “Саккырыр” аэропордун сирин-уотун уонна Портовская уулуссаны тупсарыыга эскиз бырайыагын күрэһин бу саас улуус дьаһалтата биллэрбитэ. Күрэскэ барыта 5 үлэ киирбититтэн, Оҕо саас киинин уруһуйга куруһуогун салайааччыта Мир Слепцов үлэтин анал хамыыһыйа үрдүктүк сыаналаан, кыайыылаах үрдүк аатын ылбыта.
Ураты талааннаах уһуйааччыны бу бэлиэ күнүнэн өссө төгүл эҕэрдэлиибит, элбэх уруһуйдьут оҕолору үүннэрэ-сайыннара тур диэн баҕа санаабытын тиэрдэбит.