Эбээн – Бытантай улууһун Кустуур нэһилиэгэр Кумах Сыһыы учаастагар турар оҕону үлэҕэ иитэр – үөрэтэр бааса үлэтин саҕалаан, от ыйын 19 күнүгэр уопсайа 8 оҕо уонна 4 салайааччы таҕыстылар. «Мин эмиэ хамаандаҕа киирэн тыа, сайылык олоҕун бэйэм эппинэн-хааммынан билэн кэллим”, — диэн «Бытантай кэскилэ» пресс – киин эдэр кэррэспэндиэнэ Наум Наумов кэпсиир.
«Кустуур орто оскуолата бу сылга бастакытын оҕону үлэҕэ иитэр – үөрэтэр баасаларыгар тахсан үлэлии-хамныы, ону тэҥэ сынньана сылдьаллар. Үгүс төрөппүттэр оҕолорбут тыаҕа тахсан тугунан дьарыктаналларый диэн интэриэһиргииллэр. Уолаттар салайааччыларын Егор Иннокентьевичтыын дьиэ тас үлэтин оҥорорго көмөлөһөллөр. Олорор дьиэлэрин таһыгар суунар душ, балаакка (остолобуой) уо.д.а. тута сылдьаллар, онтон кыргыттар салайааччыларын Матрена Алексеевналыын, Виктория Ивановналыын дьиэ ис үлэтин оҥорон, ас астаан, минньигэс сылаас астарынан күндүлүүллэр, дьиэ ырааһын тута олороллор, ону тэҥэ кыыс – уол, улахан – кыра диэн арахсыбаккалар эрэ от харбыыллар.
Иллэҥ кэмнэригэр оҕолор уонна салайааччылар бары араас оонньуулары оонньууллар, ол эбэтэр волейбол, лапта, батментон, араас остул оонньууларын. Манан эрэ муҥурдаммакка, сир астыыллар, балыктыыллар, онон бириэмэлэрин олус туһалаахтык, умнуллубаттык атаараллар диэн бэйэм харахпынан көрөн, кулгаахпынан истэн кэллим.
Кумах Сыһыы сиригэр-уотугар оҕо үөрбүт – көппүт чаҕаархай күлүүтэ мэлдьи иһиллэ турдун!» -диэн эдэр кэррэспэндьиэн уол бааса үлэтин-хамнаһын сиһилии сырдатта.
«Бытантай уоттара»