Култуура эйгэтэ, ордук тыа сиригэр нэһилиэнньэҕэ суос-соҕотох дьон сынньалаҥын тэрийэр уонна духуобунай сыаннастары тарҕатар. Ханнык баҕарар тэрээһин култуура кыттыгаһа суох сатаммат.
Үгүс элбэх тэрээһиннэри ыытар, күннэри – түүннэри кэнсиэр, испиктээк уонна да атыны бэлэмнээн утуйар ууларын умнан, саҥаны – кэрэни айар – тутар, биһигини сэргэхситэр дьоммутун идэлээх бырааһынньыктарынан хойутаан да буоллар эҕэрдэлиибит!
Бу үгүс сыраны – сылбаны эрэйэр, ол эрэн ураты умсугутуулаах эйгэ идэлээх күннэрин туһунан улууска култуура салалтатын салайааччыта Степан Слепцовтыын кэпсэттибит.
- Култуура эйгэтэ хас биирдии киһи личность быһыытынан сайдыытыгар сүрүн оруолу ылар эйгэ буолар. Биһиги эйгэбит сүрүн хайысхата норуот уус-уран традициятын, дьарыгын, култууратын, төрүт үгэстэрин харыстаан, сөргүтэн үүнэр көлүөнэҕэ тиэрдии, иҥэрии буолар. Ону тэҥэ нэһилиэнньэни, уопсастыбаны түмэр, сомоҕолуур, сүрүннүүр сыаллаах -соруктаах үлэлиибит.
Биһиги хоту дойду төрүт аҕыйах ахсааннаах норуоттарын, чуолаан эбээн норуотун умнулла быһыытыйбыт тылбытын-өспүтүн, күн бүгүҥҥэ диэри туттан кэлбит дьарыкпытын, сиэрбитин-туоммутун чинчийии, сөргүтүү, тарҕатыы, саҥаны арыйыы үлэбитигэр сүрүн хайысха быһыытынан өрө тутуохтаахпыт.
Кулун тутар 25 күнэ, дойдубутугар Култуура үлэһиттэрин идэлээх күннэрэ бэлиэтэнэр. Биһиги улууска сылын ахсын бу күннэргэ табаһыттарбыт бырааһынньыктарын тэрээһиннэрин бэлэмнэнии үлэтин үгэнэ буолар. Ол иһин, бэйэбит бырааһынньыкпытын хойутуу да буоллар, бэлиэтиир үгэстээхпит. Быйыл муус устар 9 күнүгэр Эбээн-Бытантай национальнай улууһун култууратын үлэһиттэрэ Дьарҕаалаах нэһилиэгэр тиийэн бэлиэтээтибит.
Олохтоох кэлиэгэлээрбит сүрдээх үчүгэйдик көрсөн, Бытантай үрэҕэр сынньалаҥы тэрийдилэр. Миэстэтигэр тиийэн балыктааһын күрэҕэ ыытылынна. Ойбон тэһиитэ, бастакы балык, улахан, кыра балык хаптарыытыгар күрэхтэстибит.
Идэлээх күммүтүгэр аан бастакытын култуура үлэһиттэрин Спартакиадатын тэрийдибит. Ол курдук тенниска, ох саанан, сыал ытыыларыгар, маамыкта быраҕыытыгар, дистанцияҕа сүүрүү, канат тардыһыы күрэхтэрэ ыытылыннылар.
Идэлээх күммүтүн бэлиэтиир дьоһун чааска улууспут бары култуура тэрилтэлэригэр олохтоох эбээн норуотун үгэһинэн, оһуордарынан оҥоһуллубут сиэргэ-туомҥа туттуллар “Көмүлүөк” фирмаҕа анаан сакаастаан оҥотторбут иһиттэри, тэриллэри бэлэх ууннубут, эҕэрдэ, махтал суруктары туттардыбыт.
Быйыл өр кэмнээх айымньылаах, үтүө суобастаах үлэтин Саха Өрөспүүбүлүкэтин култууратын Туйгуна аат «Гарпан” этнокультурнай киин үлэһитэ Ефимов Александр Викторовичка иҥэрилиннэ, бочуоттаах бэлиэннэн наҕараадаланна. Ону таһынан СӨ култуураҕа, духуобунаска министиэристибэтин Почетнай грамоталара Рябчиков Щерзот Николаевичка, махтал суругунан Аммосова Мария Ивановнаҕа, Поисеев Василий Михайловичка үөрүүлээх быһыыга-майгыга туттарылынна. Ону таһынан, нэһилиэнньэни сэргэхситэн култуура үлэһиттэрин күүстэринэн эҕэрдэ кэнсиэр тэрийдибит.
Түгэнинэн туһанан, күндү биир идэлээх кэлиэгэлэрбин, култуура эйгэтин ытык — мааны бэтэрээннэрин, норуот духовнай өттүнэн баай, иитэр-үөрэтэр, чинчийэр, сайыннарар ыарахан, ол эрэн сырдыгы -кэрэни ыралыыр үлэҕитигэр кылааккыт иһин, бэриниилээхтик үлэлии сылдьаргытыгар ис сүрэхтэн махтанабын!
Айар-тутар дьоҕургут күнтэн-күн, сылтан-сыл сайда чэчирии турдун, үлэҕитигэр ситиһиилэри. Элбэх махталлаах көрөөччүлэри, ааҕааччылары. Дьиэ кэргэҥҥитигэр или-эйэни, чэгиэн, дьоллоох олоҕу баҕарабын!
Яна РОЖИНА