Ахсынньы 14-16 күннэригэр Дьокуускай куоракка сүрдээх улахан тэрээһиннээх «Кубок Арктики» күрэх буолан ааста.
Бу саҥа ыыттыллыбыт тэрээһин хайдах быһыылаахтык ааспытын, ханнык спорт көрүҥнэрэ киирбиттэрин, биһиги улууспут ыччаттара хайаспыттарын сиһилии билээри хара маҥнайгыттан тэрийсэн, күрэхтэһээччилэргэ күүс-көмө буолан барытыгар тэҥҥэ сылдьыспыт, улуус дьаһалтатыгар дьиэ кэргэн боппуруостарыгар салалта салайааччыта Саргылаана Петрова кэпсэттибит.
— «Кубок Арктики» күрэх бу сылга бастакытын, Эдьигээн оройуона тэрийэн, иилээн-саҕалаан ыытта. Биһиги улууспут балаһыанньатын тутан, күрэхтэһии көрүҥнэрин билсэн баран, улуус аҕа баһылыга Иннокентий Стручков кытаатыҥ, маннык тэрээһиҥҥэ кыттыыны ылыахпытын наада диэбитигэр, устудьуоннар түмсүүлэригэр тута тахсыбыппыт. Онтон спортивнай оскуола дириэктэрэ Мария Афанасьева кыттыһан, олохтоох ыччат түмсүүтэ көҕүлэнэн түмсүү үлэтэ саҕаламмыта. Бары түһүнэн кыттааччылары көрдөөн, үҥкүү туруорарга Василий Старостины кэпсэтэн, син хамсааһын тахсыбыта. Биир кэлим формабытын бэйэбит кыыспытыгар Мария Слепцоваҕа оҥотторбуппут, кини биһигини өйөөн 10% чэпчэтии оҥорбута. Дьокуускайга Иннокентий Николаевич, Александра Викторовна, Константин Иванович, Дмитрий Олегович буолан, «Мой бизнес» тэрилтэ партнёр быһыытынан конференц — саалаларын уларсан, кыттааччылары кытта көрсүһүү оҥорбуппут.
Сарсыҥҥы күнүгэр мандат ааһан, күрэхтэһиибит саҕаламмыта. Бастакы күн кыргыттарга, уолаттарга волейбол уонна стратегическай сессия буолбута. Кыргыттарбыт 12 хамаандаттан 6-с буолбуттара, уолаттарбыт 8-с. Иккис күн мини — футбол буолбута, уолаттарбыт бэлэмэ суох эрээри олус өрө көтөҕүлүүлээхтик, үчүгэйдик кыттыбыттара диэххэ наада. Үһүс күммүтүгэр хапсаҕайга улахан ыйааһыҥҥа Семен Максимов 3 миэстэҕэ тахсан үөрдүбүтэ. Аркаан быраҕыыга Уйгулан Горохов уонна Лаура Попова кыттыыны ылбыттара. Дмитрий Саввинов күрэхтэһиигэ барытыгар кыттааччылары кытта тэбис тэҥҥэ сылдьыһан, сүбэ-ама биэрэн бэйэтин тус кылаатын киллэрдэ. Хореографический нүөмэргэ үҥкүүнү Василий Старостин үлэтин таһынан быыс булан, кыттааччыларбытын ис санаатын ууран туран дьарыктаан, көстүүмнэрин Мария Юрьевна кулууптары кэпсэтэн, куоракка ыыттаран көмө бөҕөтүн оҥордулар. Вокал түһүмэҕэр Уруйдаана Слепцова Тааттаттан кэлэн кыттыыны ылла. «Хозяйка Арктики» түһүмэххэ Мария Осипова илиитинэн 6 чаас устата эр киһи сэлиэччигин тиктэ, кини дьүүллүүр сүбэ сыанабылын ылан 4-с миэстэ буолла. Художественнай күрэххэ Аннавера Никитина кыттан 2 миэстэни ситистэ.
Маннык күрэхтэһии сыл аайы ыытыллыаҕа диэн биллэрдилэр, быйыл кыттааччыларбыт бары олус көхтөөтүк кытынныллар, бириэмэлэрин аттаран дойдуларын чиэһин көмүскээтилэр. 8-с миэстэ буолбуппутуттан үөрэбит, быйыл эрчиллии курдук буолла, эһиил өссө үчүгэйдик кыттыахпыт, эрдэттэн бэлэмнэниэхпит, диэн ыччаттарбыт эрэх туруннулар.
Маннык күрэхтэһиилэр үбү-харчыны эрэйэллэр, ол курдук спортсменнар страховкалара, биир тэҥ таҥастара, улуус аатыттан анал бириис туруоруллубута. Иннокентий Николаевич ыччаты өйөөн, саҕалааһыннарыгар күүс — көмө, өйөбүл, тус бэйэтинэн кэлэн кыттан, ыалдьан көх биэрбитигэр кыттааччылар ааттарыттан улахан махтал тылларын тиэрдэбит.
Маннык дьону түмэр, сибээстиир, Арктика улуустарын ыччатын сүүмэрдиир күрэхтэр ыытылла туралларыгар баҕарабыт. Өйөөбүт, көмөлөспүт, кыттыбыт дьоммутугар истиҥ эҕэрдэ, саҥа үүнэр сыл ситиһиини аҕаллын, доруобай буолуҥ, этэҥҥэ сылдьыҥ!
Марианна СЛЕПЦОВА