Балаҕан ыйын 12 күнүгэр А.С. Садовников аатынан Дьарҕаалаах орто оскуолатыгар эти-сиини чэбдигирдэр, физкультуранан дьарыктаныыга сыһыарар, чөл олоҕу көҕүлүүр сыаллаах бүтүн Арассыыйатааҕы «Кросс наций» сүүрүү күнэ ыытылынна.
Кросска алын сүһүөх кылаас оҕолоруттан саҕалаан учууталларга тиийэ кыттыыны ыллылар. Аҕам саастаах сүүрээччинэн Наталья Петровна Горохова ааттанна.
Бу акцияҕа Сардаана Разиновна уонна Николай Васильевич Слепцовтар, эдэр учуутал дьиэ кэргэн, оҕолорунаан кыттыыны ылбыттара кэрэхсэннэ.
Тэрийээччилэр «Кросс наций» сүүрүүгэ бастаабыт оҕолорго грамота, кыттыбыт үөрэнээччилэргэ барыларыгар сэртипикээт туттардылар.
Сүүрүүнү тэҥэ үгэс буолбут эстафета ыытылынна. Оскуола оҕолоро икки бөлөххө арахсан, хамаанда туруоран күрэхтэстилэр. Эстафета түмүгүнэн Айгылаан Баишев хамаандата кыайан, үөрэн-көтөн күрэхтэһии түмүктэннэ.
Сүүрүү күнэ бэрт көхтөөхтүк тэрилиннэ.