Алтынньы ый 1 күнүгэр — Аан дойду кырдьаҕастарын күннэрэ.
Бу күн Арассыыйаҕа 1992 сыллаахтан «Кырдьаҕастар куннэрэ» диэн бэлиэ күн анаммыта. Биһиги өрөспүүбүлүкэбитигэр сыл ахсын алтынньы ыйга бэлиэтиир үтүө үгэс баар.
Кырдьаҕастар аан дойдутааҕы күннэрэ ытыктабыл уонна үгэс эрэ быһыытынан бэлиэтээһин буолбакка, аҕа көлүөнэ дьонугар күннэтэ ахсаабат болҕомто, истиҥ кыһамньы уурарбытын санатар ытык күн буолар.
Биһиги улууспутугар барыта 75 уонна онтон үөһээ саастаах 73 киһи олорор. Кинилэр истэригэр 3 тыыл бэтэрээнэ, 30 “Сэрии оҕолоро” бааллар. Социальнай өҥөнөн соҕотох олорор уонна доруобуйаларыгар хааччахтаах 20 киһи туһанар. Кинилэргэ нэдиэлэҕэ иккитэ социальнай үлэһиттэр дьиэлэригэр тиийэн дьиэ үлэтин оҥороллор, маҕаһыыҥҥа сылдьан наадыйалларын ылаллар, кыһалҕаларын быһаарарга көмөлөһөллөр. Үс нэһилиэккэ барыта 4 социальнай үлэһит баар. Ону таһынан сытар кырдьаҕастарбытыгар “Помощник по уходу” үлэлиир. Үрдүк биэнсийэлээх кырдьаҕастарга төлөбүрдээх социальнай өҥөлөрү оҥоробут. Маны тэҥэ, от ыйын 1 күнүттэн тэхиниичэскэй тэриллэри уларсык биэрэр пуун үлэлиир(Пункт проката ТСР). Бу пуунтан наадыйар дьон кэлээскэ, торуоскалара, костыльлары уо.д.а. уларсан туһаныахтарын сөп, — диэн улууска социальнай харалтаҕа социальнай үлэҕэ исписэлииһэ Елена Ефимова иһитиннэрдэ.
Яна Рожина