Дьокуускай куоракка Эбээн Бытантай улууһуттан төрүттээх ыччаттар “Иркун” түмсүүлэрэ эдэрдии эрчимнээхтик үлэлиир, уопсастыбаннай олоххо мэлдьи көхтөөх кыттыыны ылар. Бу хамсааһыны биһиги биир дойдулаахпыт, ХИФУ нуучча тылын учууталын салаатыгар 3 кууруска үөрэнэр Алина Тоскина салайар.
“Мин Дьокуускайдааҕы финансовай колледжы бүтэрэн баран, билигин Максим Кирович Аммосов аатынан Хотугулуу-Илиҥҥи федеральнай университет нуучча тылын учууталын салаатыгар 3 куурус устудьуона буолабын.
2020 сыллаахха оскуоланы бүтэрэн, устудьуоннуу кэлиэхпиттэн ыла ахтыбыыстыыбын. Бастаан «Арассыыйа устудьуоннарын этэрээтигэр» сылдьар этим, билигин өрөспүүбүлүкэ улуустарын холбоһуктарын тэрилтэтигэр «ZEMA» Эбээн-Бытантай улууһун эдэр ыччатын түмсүүтүн «Иркун» салайааччыта буолабын. Улууспут устудьуоннара буолан бары мустан, көрсөн-кэпсэтэн араас элбэх ZEMA тэрээһиннэригэр кыттабыт. Онно атын улуустары кытта билсэр тэрээһиннэри кытары спортивнай күрэхтэр, волонтерскай хамсааһыннары оҥоробут. Холобур, ыйын аайы «Эдэр ыччакка сөптөөх суолу ыйан, кэлэр көлүөнэҕэ холобур буолан» диэн эко-акция оҥоро тахсабыт, онно Сахабыт сирин биллиилээх дьонун сквердарын баран бөҕүн-сыыһын ыраастаан, сууйан хомуйабыт.
Ааспыт нэдиэлэҕэ «Дьулаан киэһэтэ» диэн үҥкүү күрэҕэр Булуҥ улууһун кытта холбоһон бастакы миэстэни ылбыппыт, ону кытары «Сахалыы саҥар, сахам ыччата» диэн викторинаҕа эмиэ бастаабыппыт.
Кылгастык ыччаттар хамсааһыннарын туһунан кэпсээтэххэ, ZEMA диэн улуустар икки ардыларыгар ил-эйэ, чөл олоҕу тутуһуу, патриотизм тыыныгар иитэр уопсастыбаннай тэрилтэ буолар. Онтон биһиги, Эбээн-Бытантай устудьуоннара, «Иркун» түмсүүбүт улууспут кэскилин туһугар диэн мустан, көрсөн, оҕолор бэйэбит икки ардыбытыгар доҕордоһуу оҥоробут. Ону тэҥэ улууспут баһылыгын Иннокентий Стручкову, Эбээн-Бытантайга олорор, үлэлиир ыччаттары кытары билсэбит, бииргэ үлэлэһэбит,” – диэн Алина ыччаттар хамсааһыннарын туһунан сырдатта.
Сардаана Копырина