«Иҥэньгидэ төр куҥални бисэп» Хоту сир утум салҕыыр кэнчээрилэрин сүлүөтэ сэргэхтик ааста

Бу күннэргэ төрүт дьарыгы өрө тутар табаһыт оҕолор сүлүөттэрэ Тирэхтээх сиригэр – уотугар буолан ааста, тэрээһини И.Н.Слепцов аатынан агрооскуола көҕүлээн үһүс төгүлүн ыытар. Быйылгы сүлүөт дойдуга Дьиэ кэргэн, Саха сиригэр Оҕо саас, Эбээн Бытантай национальнай улууһа төрүттэммитэ 35 үбүлүөйдээх, Тыа хаһаайыстыбатын уонна Аллараа Бытантайга Аҕа сылларыгар ананна. Бу туһунан педагог Валентина Колесова үөрэн туран кэпсээтэ.

—              Кустуур орто агрооскуолатын үлэһиттэрэ, дириэктэр Матрена Горохова салайааччылаах  Тирэхтээххэ баран, сүрдээх үчүгэй сүлүөт ыыттыбыт. Улуустааҕы үөрэх салалтатын начаалынньыга Петр Потапов Саха Өрөспүүбүлүкэтигэр аҕыйах ахсааннаах норуоттар Ассоциацияларын Президенин Константин Роббек уонна Виктория Шумилова аатыттан эҕэрдэлэри үөрүүлээх быһыыга ааҕан иһитиннэрдэ.  Сүлүөппүтүгэр барыта 12 оҕо кытынна. Араас көрүҥнэргэ уопуттаах табаһыттар сүлүөттэриттэн туох да уратыта суох, сүрдээх тыҥааһыннаах күрэхтэр буоллулар. Оҕолор күн устата сыарҕалаах табанан, уучаҕынан да сүүртүлэр, маамыкта быраҕан күрэхтэстилэр. Комбинированнай эстафетаны «Кочевник» ородобуой община буҕаалтыра, улууска таба иитиитин салаатыгар баай уопуттаах, бас – көс киһибит Наталья Слепцова уонна улуус дьаһалтатын, “Турукаан” ородобуой община бэрэстэбиитэлэ Галина Другина иилээн – салайан ыыттылар. Маны тэҥэ, хотугу хапсаҕай күрэҕин Саккырыыртан тренер анаан -минээн кэлэн Семен Максимов салайан, кылаабынай суудьуйалаан ыытта, кинини кытта физкультура учууталара Василий Попов,  Михаил Горохов үлэлээтилэр. Күрэхтэргэ барытыгар табаһыт дьоммут сүрүн салалта буоллулар, ол курдук “Кочевник2” биригэдьиирэ Марат Слепцов, “Кочевник1” биригэдьиирэ Альберт Колесов, “Турукаан” Р/о уонна Аллараа Бытантай олохтоох дьаһалта бэрэстэбиитэлэ И.Д.Горохов. “Хозяйка чума” күрэскэ 4 кыыс кытынна, кыайыылааҕынан Кустуур оскуолатын 10 кылааһын үөрэнээччитэ Арина Старостина буолла. Сүлүөт кыттыылаахтарыгар, ыалдьыттарыгар анаан балаакка турбута, манна учууталлар уонна төрөппүттэр ыыппыт минньигэс астарынан баай сандалы тардылынна. Онон, оҕолорбут да ыалдьыттарбыт да, күн устата иттэн, тото -хана чэйдээн астынан сырыттыбыт.

Улууспут Аҕа баһылыга Иннокентий Стручков, кини солбуйааччыта Александра Иванова, тэрилтэлэр уонна биирдиилээн дьон үгүс элбэх бириис туруордулар. Онон, оҕолорбут бары илии тутуурдаах, үөрүү аргыстаах буоллулар. Түгэнинэн туһанан, бука барыгытыгар улахан махталбытын тириэрдэбит! Күүс – көмө буолбут дьоммутугар, спонсордаабыт тэрилтэлэргэ, сирдьиттэргэ И.Д.Гороховка, М.В.Гороховка, буранынан тиэйбит В.А.Поповка, Е.И.Другиҥҥа, М.И.Гороховка, хаартыска түһэрээччи Варвара Шадринаҕа, асчыттарга А.И.Слепцоваҕа, В.Г.Стручковаҕа, О.Н.Рожинаҕа,  наҕараада суругун – бичигин бэлэмнээбит С.С.Черепановаҕа, Х.Г.Старостинаҕа уонна оскуолабыт кэлэктиибигэр муҥура суох махтанабыт.

Биир сүрүн, улахан махтталбытын улахан да улахан, минньигэс да минньигэс бырааһынньыктааҕы торт оҥорон бэлэхтээбит учуутал Надежда Старостинаҕа этэбит. Ойор – тэбэр оҕо саас умнуллубат түгэннэрин биир сырдык өйдөбүлэ бу сүлүөт буолуохтун!

 

Читайте дальше