Имигэс илиичээннэр – кырачаан акробаттар Кытай сиригэр тиийэ сырыттылар

Бу күннэргэ Хэйхе куоракка Арассыыйа уонна Кытай өрөспүүбүлүкэтин икки ардыларыгар Култуура сылын иитинэн «Золотая осень” фестиваль иитинэн күрэх буолла. Манна, ыраах Эбээн Бытантайтан «Осикатал» акробаттар бөлөхтөрө ситиһиилээхтик кытыннылар. 7 кырачаан кэрэ Куолары 3 төрөппүт уонна салайааччы Христина Стручкова салайан илдьэ сырыттылар. Бу туһунан Христина Иннокентьевна төлөпүөнүнэн кэпсээтэ.

  • Биһиги омук сиригэр сүрдээх улахан таһымнаах күрэххэ кытынныбыт, олус үчүгэйдик сырыттыбыт. Саха сириттэн маҥнай теплоходунан, онтон поеһынан айаннаан, Благовещенскайга кыраныыссаны туораан, салҕыы автобустанан Хэйхебытыгар тиийбиппит. Кырачаан кыттааччыларбыт айантан илистибэккэ, улахан киһи курдук дьоһуннук сырыттылар. Хэйхеҕа наһаа үчүгэйдик көрүстүлэр, түмэлгэ сырытыннардылар. Сарсыныгар долгутуулаах күрэхпит саҕаланна, Саха сириттэн 3 бөлөх кытынныбыт. Күрэх наһаа үрдүк таһымнаах, тэрээһинэ олус үчүгэй, барыта чопчу, орун оннугар. Биһиги бэһис нүөмэринэн таҕыстыбыт, ытыс тыаһа доргуйа түстэ, ыһыы-хаһыы ньиргийдэ. Валериябыт соҕотох тахсан нүөмэрин көрдөрбүтүгэр, таптаан-манньыйан саҥа – иҥэ бөҕө буола түстүлэр, ытыс тыаһа күүстээҕин ылла. Атын кыттааччылар бары үҥкүү нүөмэрдээхтэр, биһиги эрэ акробатиканы көрдөрдүбүт. Салҕыы Удалянчи куоракка Гала – кэнсиэргэ кытта бардыбыт. Манна ытыс үрдүгэр илдьэ сырыттылар, фестиваль салайааччыта Дмитрий Чан оҕолорбутун наһаа хайҕаата, өссө биһирээбитин биллэрэн мэтээллэри уонна бэлэхтэрин туттаран уйадытта.

Сити курдук, I истиэпэннээх Лауреат үрдүк аатын ситиһэн үөрэн – көтөн, хайҕал үрдүгүн ылан, астынан аҕай кэллибит. Кытай оскуолатыгар сылдьан маастар – кылаас көрдөрдүбүт, кинилэр өйдөрүгэр баппат ыраах хоту сиргэ акробатиканан дьарыктанарбытын наһаа сэргээтилэр, кэрэхсээтилэр. Бу маннык ыраах сиргэ, үрдүк таһымнаах тэрээһиннэргэ кытта барарга биллэн турар дьоһун өйөбүлү эрэйэр. Түгэнинэн туһанан, биһиги сырыыбытыгар күүс – көмө, улахан өйөбүл буолбут дьоммутугар – улуус баһылыгар Иннокентий Стручковка, солбуйааччытыгар Александра Ивановаҕа, «Хаарчаана” уһуйаан сэбиэдиссэйигэр Марина Верховскаяҕа, үөрэх салалтатын салайааччытыгар Петр Потаповка, оҕо уонна ыччат спортивнай оскуолатын дириэктэригэр Мария Афанасьеваҕа уонна бары төрөппүттэрбитигэр, чуолаан барса сылдьыбыт Айсана Аммосоваҕа, Мария Стручковаҕа уонна Адека эдьиийигэр Кристинаҕа барҕа, муҥура суох махталбын этэбин! Кэнчээрибит сайдарын туһугар ахсаабат кыһамньыгыт уҕараабатын, уон оччоннон үтүө хоруйдаах буоллун, оҕолорбут дьоһун дьон буола улаатаннар төрөөбүт улуустарын өрүүтүн ааттата сырыттыннар!

Яна Рожина

 

Читайте дальше