И.Н. Слепцов аатынан Кустурдааҕы агропрофилированнай оскуола үлэлиир сүрүн соруктарынан буолаллар:
- Үөрэнээччи образовательнай программаны толору ылынан олоххо уонна обществоҕа адаптацияланар, инники торумнарын толкуйдаан таларыгар уонна идэҕэ үөрэнэригэр бастакы олугу ууруу;
- Үөрэнээччи личность быһыытынан сайдарыгар, кини айар дьоҕура сайдарыгар, үөрэххэ интэриэһин көҕүтүүгэ, үөрэххэ баҕаны уонна дьулууру иитиигэ усулуобуйаны тэрийии;
- Билии, үөрэх уонна үөрүйэх уопуттарын уонна үлэ араас көрүҥнэрин систиэмэтин толору туһаныы;
- Үөрэнээччилэр эт-хаан өттүнэн, уйулҕаларын уонна социальнай доруобуйаларын харыстааһын;
- Нравственнай, патриотическай, эстетическай иэйиилэр, эмоциональнай-ценностнай бэйэҕэ уонна тулалыыр эйгэҕэ үтүѳ сыһыаны иитии.
Оскуола миссията: Тыа сирин олоҕор бэлэмнээх, үлэҕэ сыстаҕас, тыа хаһаайыстыбатын бары өрүтүгэр сатабыллаах, сиргэ, техникаҕа, тулалыыр айылҕаҕа харыстабыллаах сыһыаннаах сир хаһаайынын иитии.
2023-2024 үөрэх дьылын 100% ситиhиилээх, 53,7% хаачыстыбанан түмүктээбиппит.
Оскуоланы бүтэрээччилэр 100% биир кэлим эксээмэннэрин туттаран ситии-хотуу аттестатын ылан бары үөрэххэ киирдилэр. Сүрүн сүhүөх оскуоланы бүтэрээччилэр 100% судаарыстыбаннай эксээмэннэрин туттаран 10 кылааска үөрэнэ сылдьаллар.
Үөрэнээччилэрбит Юнармия кэккэтигэр киирбиттэрэ. Манна улуус дьаьалтата өйөөн, юнармеецтар формаларын ылбыппыт. 15 юнармеец удостоверениеларын уоппускатыгар кэлэ сылдьар биир дойдулаахпыт, анал дьайыы кыттыылааҕа Слепцов Рахмон Рахмонович туттарбыта. Юнармейскай этэрээт бэйэбит киэн туттар выпускникпыт Горохов Иван Семенович аатын сүгэр. Иван Семеновичка анаан оскуолабытыгар «Парта Героя” онорбуппут бочуоттаах миэстэҕэ турар.
Ону таһынан бүтүн Арассыыйатааҕы ФИРЯ «Расскажи о своей кочевой школе» күрэҕэр Горохов Ранид 8 кыл. үөрэнээччитэ кыайан, Дьокуускай куоракка «Бэс Чагдаҕа» путевканы бэлэх тутан сынньанан кэлбитэ. Ранид өрөспүүбүлүкэтээҕи «Кочевье глазами детей» күрэххэ видеоролик онорон, Кыайыылаах аатын сүкпүтэ. «Юный труженик сельского хозяйства – будущее района» улуустааҕы күрэххэ Ранид кыайан, харчынан бириэмийэлэммитэ.
Олунньу ыйга Дьааҥы улууһугар ыытыллыбыт I Арктическай форумҥа биһиги оскуола дэлэгээссийэтэ кыттыбыттара, оскуола үлэтин сырдатан, Арктическай образовательнай пространствоҕа ситимнээх үлэ былаанын торумнаспыттара.
Кулун тутар ый бүтүүтэ Чинэндьэҕэ, «Кочевник-1» кыстыыр сиригэр «Мэрлэнкэ» көс оскуолаҕа «Арктиктелеком” интернет уонна НВК “Саха” телевидение оборудованиетын снегоходтарынан тиэйэн илдьэн туруоран, интернекка холботтубут. Табаһыт оҕолорбут түргэн үчүгэй интернетынан, солнечнай панеллаах телевидениеннан хааччылыннылар.
Муниципальнай педагогическай «Учитель года» куонкуруска саха тылын учуутала Горохова Елена Афанасьевна кыайыылаах буолбута.
Муус устар 12 күнүгэр Тирэхтээх сиригэр-уотугар үтүө үгэс буолбут табаһыт оҕолор сүлүөттэрин улууспут 35 сыллаах үбүлүөйүгэр уонна улууспутугар биллэриллибит Тыа хаһаайыстыбатын сылыгар анаан үрдүк таһымнаахтык ыыттыбыт.
Муус устар ыйга биһиги оскуолабытыгар чөл олох уонна спорт үтүө үгэһэ буолбут, физкультура учуутала Горохов М.И. авторскай «Бытантай оонньуулара» күрэх улуус спортсмен оҕолорун түмпүтэ.
Ыам ыйыгар «Кумах Сыһыы» үөрэтэр-производственнай баасаҕа үөрэнээччилэри бултка-балыкка сыһыаран уонна мас бэлэмниир субуотунньуктаах сынньалаҥ тэрийбиппит. Манна учууталлар уонна 8 үөрэнээччи 3 хонукка сынньанан, үөрэнэн, үлэлээн кэлбиттэрэ.
Оскуолабыт материальнай — техническэй баасатын бөҕөргөтүүгэ кэккэ үлэлэр сааскы уонна сайынҥы кэмнэргэ ыытылынныллар. Ол курдук, «Кумах Сыһыы» үөрэтэр-производственнай баасабытыгар баар 2 кыбартыыралаах дьиэҕэ сайынҥы остолобуой, сынньанар сир буолар веранда тутулунна уонна оскуолабыт массыынатыгар гараж туттардыбыт. Культурнай спортивнай киин спортсаалатыгар үөрэнэр усулуобуйаны тупсарыыга үлэ барда, кыргыттарга уонна уолаттарга тус-туспа гардеробнай хостор быыстанан оҥоһулуннулар, саала муостата уонна батареялара кырааскаланнылар, видеонаблюдение туруорулунна. Улахан оскуола дьиэтигэр эмиэ кэккэ тупсарыы үлэтэ күһүн ыытылынна – кабинеттар ааннара уларыйда, остолубуойга саҥа остуоллар, устууллар турдулар.
Сайын сыл аайы буоларын курдук, оҕуруот аһын үүннэрэн нэһилиэкпит дьонугар-сэргэтигэр хамаҕатык атыылаатыбыт, сибэкки арааһын үүннэрэн олбуорбутун киэргэттибит.
Быйыл XX педагогическай ярмаркаҕа биһиги оскуола ситиһиилээхтик кыттан, кыайыы өрөгөйүн ыллыбыт. Ол курдук оскуолабыт үлэлии олорор «Оли-Гали» диэн улахан бырайыага «Арктическое образование в едином пространстве» секцияҕа I миэстэни ылан 25 тыһ.солк. Гранынан наҕараадаламмыппыт. Маны тэҥэ, II өрөспүүбүлүкэтээҕи көс оскуолалар учууталларын күрэҕигэр агро-производственнай үлэҕэ дириэктэри солбуйааччы Колесова В.Н. кыттан I миэстэни ылбыта.
От ыйыгар «Сайдыы» волонтерскай этэрээт оҕолоро «Кумах Сыһыы» үөрэтэр-производственнай баасаҕа тахсан, былааннаах отторун бэлэмнээн, от үлэтигэр, тыа хаһаайыстыбатыгар сыстан, сайыннарын туһалаахтык атаардылар.
Атырдьах ыйыгар Бүтүн Арасыыйатааҕы конкурснай үөрэҕирии программатынан «Россия аҕыйах ахсааннах норуоттара. Общественнай дипломатия оскуолата» тэрээһинҥэ биһиги оскуолаттан агро-производственнай үлэҕэ дириэктэри солбуйааччы Колесова В.Н. кыттан «Мэрлэнкэ» көс оскуолабытын сырдаппыта.
Быйыл нуучча тылын уонна литературатын учуутала Старостина Раиса Гаврильевна «Саха Республикатын 100 бастыҥ учууталлара» кинигэҕэ тахсыбыта.
Күһүн дьааттаах оту хомуйууга оскуола кэлэктиибэ уонна үөрэнээччилэр субуотунньукка күргүөмүнэн тахсан көмөлөспүттэрэ.
Үөрэх дьылын арыллыыта «Күһүнҥү Баал» ньиргийбитэ. Манна ааспыт үөрэх дьылын туйгун уонна үчүгэй үөрэхтээхтэри чиэстээтибит.
Үгэс быһыытынан «Күһүн бэлэхтэрэ» дьаарбаҥка тэрийэн нэһилиэнньэҕэ оҕуруот, булт-алт ас эгэлгэтин астаан, хамаҕатык атыылаабыппыт.
Алтынньы ыйга учуутал күнүгэр үөрэнээччилэр бэйэлэрэ бэлэмнээн кэнсиэр бэлэх ууммуттара. Онтон «Ийэҕэ махтал» кэнсиэргэ 100% үөрэнээччи бары кыттан нэһилиэнньэҕэ көрдөрдүбүт.
Күһүнҥү сынньалаҥ кэмигэр үөрэнээччилэри уонна төрөппүттэри кытта утумнаах үлэ ыытылынна. Ол курдук маастар-кылаастар, араас күрэхтэр, оонньуулар быыстала суох тэриллэн ыытыллыннылар. Төрөппүт биһирээн хомуска уонна кыбытык тигии маастар кылаастарыгар сырыттылар.
Алтынньы ыйга «Биракчаан» медиа — киин оҕолорун аатыттан Наумов Наум СӨ Сибээс министирэ Ефимов В.В. онлайн конференциятыгар кыттан, 50 тыһ.солк. микрофоннаах, видео устар камералаах оборудование ыллылар. Бу «Биракчаан» медиа киин оҕолорун улахан ситиһиилэрэ буолар.
Сэтинньи ыйга «Слепцовскай ааҕыылар» научнай-практическай конференция IV төгүлүн муниципальнай таһымнаах ыытылынна. Конференция кэмигэр шашкаҕа оскуола оҕолоругар муниципальнай таһымнаах күрэҕи физкультура учуутала Колесов Иннокентий Егорович иилээн-саҕалаан ыытта. Улуустааҕы «Инникигэ хардыы» конференцияҕа 9 оҕо кыттан кэккэ ситиһиилээхтэр.
Өөспүүбүлүкэтээҕи педагогическай «Учитель года» куонкуруска саха тылын учуутала Горохова Елена Афанасьевна кыттан, «Учитель- наставник» аатын ылан кэллэ.
Ахсынньы ыйга Арасыыйатааҕа «Кыһын Саха сириттэн саҕаланар» бэстибээлгэ оҕолорбут кыттаннар үгүс үтүмэн ситиһиилэннилэр. Ол курдук, II-с истиэпэннээх Лауреат «Тэтим» фольклорнай ансаамбыл улахан бөлөҕө ситистэ. Онтон «Тэтим» кыра бөлөҕө III-с истиэпэннээх Лауреат буолла, салайааччы Колесова Зинаида Анатольевна. Өрөспүүбүлүкэтээҕи «Оһуохайдаан ойуохха, эһиэхэйдээн тэйиэххэ» оһуохай күрэҕэр, Георгий Слепцов, 7 кылаас үөрэнээччитэ, ситиһиилээхтик кыттан, улуус аатын ааттатта.
«Үрүҥ таба» улуустааҕы күрэххэ «Дьиэрэй» ырыа ансаамбыла II истиэппэннээх Лауреат аатын сүктэ.
Кулун тутарга «Дьиэрэй», «Тэтим» ансаамбыллары Кытайга буолар «Ритмы дружбы» XI международнай күрэх – бэстибээлгэ ыҥырыы тутаннар, бэлэмнэнии үлэтэ барар.
И.Н.Слепцов аатынан Кустуур орто оскуолата нэһилиэккэ, улууска ыытыллар тэрээһиннэргэ көхтөөхтүк, ситиһиилээхтик кыттар. Үөрэнээччилэр, кэлэктиип уонна төрөппүттэр биир санаанан салайтаран үлэлиибит-хамсыыбыт.
Кустуур орто оскуолатын дириэктэрэ
Горохова Матрена Алексеевна