Бу күннэргэ Таатта улууһун Булуҥ нэһилиэгэр СӨ үтүөлээх тренерэ Константин Туприн сырдык кэриэһигэр аналлаах бүтүн өрөспүүбүлүкэтээҕи хотугу многоборье чөмпүйэнээтэ уонна Саха Өрөспүүбүлүкэтин Первенствота буолла. Бу күрэхтэһиигэ өрөспүүбүлүкэбит 26 оройуонуттан 190 спортсменнар мустаннар, үс күн устата күрэхтэстилэр, «Манчаары оонньууларыгар” уопсайа 80 путевка оонньонно. Биһиги улууспут хамаандата эмиэ ситиһиилээхтик кыттан, хотугу улуустарга 4-с миэстэ буолла.
«Хотугу многоборьеҕа биһиги улууспутуттан оскуола оҕолоро Северьяна Потапова, Лиана Сташкова, Данил Горохов, Давид Другин, Егор Другин, Дьулустаан Старостин уонна улахан дьонтон Михаил Боярский, Петр Старостин, Татьяна Слепцова кытыннылар.
Күрэхтэһээччилэр үс төгүл төхтүрүйэн ыстаныыга, ураҕастаах сүүрүүгэ, аркааны таба быраҕыы, сүгэни ыраахха күөрэтии, наартаны ойуу курдук күүһү-уоҕу, сылбырҕа буолууну ирдиир түһүмэхтэргэ кииристилэр. Биирдиилээн көрүҥнэргэ Лиана Сташкова сүгэни ыраахха быраҕыыга 3-с миэстэни ылла. Хомойуох иһин, путевка ылбатыбыт, кыранан хааллыбыт”, — диэн оҕо спортивнай оскуолатын дириэктэрэ Мария Афанасьева сырдатта.
Сардаана Копырина