Кустуур орто оскуолатын 8 кылааһын үөрэнээччитэ Ранид Горохов “Тыа сирин эдэр үлэһитэ-2025” өрөспүүбүлүкэтээҕи күрэскэ «Бастыҥ эдэр табаһыт” номинация кыайыылааҕа буолла.
Табаны иитии күннэтэ сыраны-сылбаны, сатабылы ирдиир. Ранид олох кыратыттан төрөппүттэрин, дьонун кытары таба иитэр ыстаадаҕа сааскы, сайыҥҥы кэмнэргэ сылдьан, көс олох ымпыгын-чымпыгын, дириҥ ис хоһоонун өйдүүр. Тыһыынчанан табалаах ыстаадаҕа өҥүнэн, иминэн хас биирдии табаны билэр. Хоту сир эр дьонун киэбинэн табылыырын таһынан бултуур, балыктыыр, туундара үүнээйилэрин үөрэтэр, көс олох туһунан научнай-практическай кэнпириэнсийэлэргэ, хотугу многоборье, табанан сүүрдүү курдук спортивнай көрүҥнэргэ кыттар, Арассыыйа, эрэгийиэн таһымнаах элбэх наҕараадалардаах. 
“Юные якутяне» өрөспүүбүлүкэтээҕи киин сылын аайы ыытар “Эдэр тыа үлэһитэ” өрөспүүбүлүкэтээҕи күрэскэ быйыл кыттан, уолум Ранид “Бастыҥ эдэр табаһыт” номинацияҕа 1 миэстэни ылла. Күрэскэ наадалаах матырыйааллары хомуйан, таҥан оҥорон кытыннарбыт салайааччыта Светлана Семеновна Черепанова буолар.
Ранид былырыын улуустааҕы «Эдэр тыа хаһаайыстыбатын үлэһитэ-2024” күрэскэ эмиэ кыттан, улуус дьаһалтата туруорбут 50 тыһ. солк. сэртипикээтинэн наҕараадаламмыта.
Оҕобут араас таһымнаах күрэстэргэ кыайыыта, ситиһиитэ биһигини кынаттыыр, үөрдэр. Салайааччыбытыгар Светлана Семеновнаҕа махталбыт муҥура суох. Маннык күрэстэр оҕолору үлэҕэ-хамнаска көҕүлүүллэр дии саныыбын”, — диэн табаһыт уол ийэтэ Федора Николаевна кэпсээтэ.
Уолбутугар Ранидка өссө үрдүк ситиһиилэри баҕарабыт! Үлэ – киһини киэргэтэр, үүнүү-сайдыы суола буолар. Тыйыс айылҕалаах дойдуга олох иһин охсуһуу, күчүмэҕэйдэри туорааһын – олохпут укулаата буолар. Өбүгэ саҕаттан кэлбит төрүт дьарыгы өрө тутар, аҕа көлүөнэ дьонтон уопуту, сатабылы, үтүө үгэстэри ылар оҕо тулуурдаах, кыайыыга дьулуурдаах, ыарахантан чаҕыйбат киһи буолан тахсар.
Табаһыт уолбут Ранид Горохов презентация үлэтин биһиги телеграм-ханаалбытыгар бу ссылканан киирэн көрүҥ, сэргээҥ: https://t.me/bytantayuottara/21403?single
Сардаана Копырина