Ааспыт нэдиэлэҕэ улуус киинигэр Саха Өрөспүүбүлүкэтигэр гражданскай оборуонаҕа уонна нэһилиэнньэ олоҕо – дьаһаҕа харысхаллаах буолуутун хааччыйар министиэристибэ миниистирин солбуйааччыта Никита Павлов уонна норуот дьокутаата, “Арктика суоллара” ХТ генеральнай дириэктэрин солбуйааччыта Сергей Сивцев үлэ сырыытынан кэлэ сырыттылар.
ОДьКХ, «Сахаэнерго”, улуус уонна нэһилиэктэр салалталарын кытта сүбэ мунньах ыыттылар. Сүрүннээн уматык тиэллиитин, суол – иис туругун уо.д.а. ырыттылар.
Улууска хаһыс да сылын дьаһалталар сайаапкаларынан таараламмыт бэнсиин тиэллэр. Бу сылга сайаапкаламмыт кээмэй аччатыллыбытын, муниципальнай суоллар туруктарын баһылыктар иһитиннэрдилэр. Никита Александрович бары этиилэри истэн баран, «улуус киинигэр уматык тиэллиитэ Баатаҕай нефтебаасатыгар саппаас суоҕуттан харгыстанна, бу сайыҥҥы кэмҥэ уу суола туран биэрбэккэ сөптөөх кээмэй тиэллибэтэҕиттэн буолар. Биһиги «Сахаэнерго» салалтатын кытта кэпсэтии ыытан турабыт, онон ыксаллаах быһыыга кинилэр саппаастарыттан утарыта сөбүлэҥ быһыытынан ОДьКХ-ҕа уматык хааччыллыаҕа. Киирбит боппуруостарга тохтоотоххо,чуолаан таараламмыт уматык тиэллиитигэр, мин бэйэм “Саханефтегаз” дириэктэрдэрин сэбиэтигэр киирэбин. Онон, сайаапкаламмыт кээмэй аччатыллыбытын тула тиийдим эрэ үлэлэһиэм. Сайаапка толору хааччыллыытыгар ааспыт сылга ылбыт кээмэйгит иэһэ суох буолара ирдэнэр.»
Сергей Сивцев: — «Бастатан туран, Эбээн Бытантай бары олохтоохторун үүммүт саҥа сылынан итиитик – истиҥник эҕэрдэлиибин! Үлэҕэ – үөрэххэ ситиһиилэри, тус олоххутугар дьолу – соргуну, дьиэ кэргэҥҥитигэр или – эйэни, бары өттүнэн табыллыыны баҕарабын! Түгэнинэн туһанан, ааспыт быыбарга миэхэ эрэммиккитигэр, өйөөбүккүтүгэр барҕа махталбын этэбин. Бу сылга маҥнайгы үлэ сырыыта мантан саҕаланна. Биһиги Никита Александровичтыын салҕыы Баатаҕайга, онтон Уус Куйгаҕа сиринэн суолу – ииһи көрөн, үөрэтэн сылдьыахпыт. Уматык тиэллиитин тула үлэлиибит. Быйыл күһүнэ сылаас, хаар халыҥ буолан кыһыҥҥы суол туругар кэккэ харгыстар таҕыстылар. Тохсунньу 15 күнүттэн Саккырыыр – Баатаҕай хайысхаҕа 30 туоннаҕа диэри уйуктаах тиэхиньикэҕэ көҥүл биэрэн олоробут. Куйгаҕа 30 туонна диэри бу күннэргэ бэриллиэҕэ.
Дьокутаат быһыытынан үлэбин балаҕан ыйыттан саҕалаабытым. Кэмитиэт бэрэссэдээтэллэрэ уонна салайааччылара, барыта 19 киһи эрэ хамнастаах буолаллар, онтон 41 дьокутаат уопсастыбаннай саҕалааһын быһыытынан норуот уйгутун туһугар күннэтэ үлэлиибит. Хас биирдии дьокутаат үс кэмитиэккэ киирэр бырааптаах. Биир кэмитиэт 17 чилиэннээх. Мин Елена Голомарева салайар, Арктика боппуруостарыгар кэмитиэккэ баарбын, ону таһынан Павел Петров салайар экэниэмикэ уонна бырамыысаланас, тыа хаһаайыстыбатын кэмитиэттэригэр үлэлиибин. Виталий Чикачевтуун үлэбитин былааннаан ыытарга сүбэлэспиппит. Алтынньы ыйтан сессиялар саҕаламмыттара. Бастакы сессиялар бырабыыталастыба уонна министиэристибэлэр састааптарын бигэргэтиигэ, бүддьүөт тыырыытыгар туһуламмыттара. Маны тэҥэ, доруобуйа харыстабылын эйгэтигэр хоту оройуоннарга быраас тиийбэтин боппуруоһа көрүллүбүтэ. Атын улуустарга тэҥнээтэххэ, манна 4 быраас тиийбэт. Холобур, Усуйаанаҕа 14 быраас тиийбэтэ бэлиэтэнэр. Салҕыы үөрэхтээһиҥҥэ хаадыр боппуруоһун тула төгүрүк остуол буолуохтаах. Чуолаан бэйэм дьокутаат быһыытынан үлэбин үүт субсидиятын тула үлэттэн саҕалаабытым, кэккэ ситиһиилэрдээх. Маны тэҥэ, хоту улуустарга субсидиялаах билиэт тиэрдиллиитин бэрээдэгэр, кээмэйигэр үлэлиибин. Кылгастык сити курдук. Виталий Семеновиһы кытта уокурукпут улуустарыгар сылдьан нэһилиэнньэни кытта көрсөн, этиилэри истэн, санаа атастаһар былааннаахпыт»
Маны таһынан, олоҕу – дьаһаҕы хааччыйар тутаах тэрилтэлэринэн сылдьан үлэни – хамнаһы билистилэр.
Яна РОЖИНА