Кулууп бөһүөлэк киинэ, сүрүн сирэйэ буолар.
Улууспут киинин «Гарпан” этнокултуурунай кииҥҥэ сайын устата ис-тас өттүгэр өрөмүөн үлэтэ сүрдээх тэтимнээхтик күөстүү оргуйда.
Бу туһунан сиһилии билээри биһиги ЭКК «Гарпан” салайааччытын Раиса Старостинаны кытта кэпсэттибит:
— «Биһиги быйыл Егор Колесов аатынан «Гарпан» этноькултуурунай кииҥҥэ өтөрүнэн да буолбатах, улахан өрөмүөн үлэлэрэ ыыттыбыт. Ол курдук, бу саас кулууппут саалатыгар натяжной потолок оҥоттордубут, бэйэбит олохтоох оҕобут Колесов Илья Егорович бэйэтэ матырыйаал сакаастаан сөмөлүөтүнэн аҕалтаран наһаа үчүгэйдик оҥордо, саалбыт ынырыктык тубуста. Онно эбии саҥа люстраларбытын култуура салалтатын салайааччыта Степан Степанович Слепцов үлэтинэн куоракка сылдьар кэмигэр түбэһэн, маҕаһыыннарга сылдьан, барытын бэйэбит көрөн-талан үчүгэй диэбиппитин, тэрилтэбит харчытынан ылларан, сөмөлүөтүнэн саас ыыттаран туруортарбыппыт, маны барытын Илья Колесов туруоран биэрбитэ.
Маны таһынан кулууппутугар сүрүн улахан үлэ ититэр ситимҥэ барда, урут бэйэҕит да өйдүүргүт буолуо, хочуолунай алдьанан тоҥоруу буола сылдьыбыта, онно анал биригээдэ кэлэн ыксалынан «ленинградскай системаннан” холбообуттар этэ. Биллэн турар, ититэр эрээри, улаханнык кыайбат буолан кулууп тымныы буолааччы. Быйыл радиатордарын уларыттаран, сөптөөх схеманнан барытын тартаран, саалбытыгар радиатордары, турбалары эбии туруортаран элбэх үлэ ыытылынна. Маны барытын, сайын устата Василий Корякин сүрдээх үчүгэйдик кыһаллан, кичэйэн оҥорбута. Күһүн ититэр ситиммитин холбуур саҕана бэйэтэ кэлэн барытын көрөн, уутун ыытарга тэҥҥэ сылдьыспыта, улахан тэстии эҥи суох, барытын кичэйэн сваркалаабыта онно көстүбүтэ. Маны таһынан, Василий Корякин устуулларбытын барытын ситимниир гына сваркалаан биэрдэ, урут биирдии устуулу үүттүү-үүттүү муостаҕа хатыыр этибит, билигин арааһынайс тэрээһинэргэ устуулларбытын хайдах баҕарар көһөрө сылдьыахпытын сөп буолла. Маннык улахан үлэлэри оҥорбутугар улахан махталбытын этэбит.
Кулууппутугар быйылгы өрөмүөҥҥэ уопсайа 9 саҥа ааны оҥоттордубут, киири, фойеттан кинобудкаҕа тахсар. Кинобудкаҕа икки саҥа үлэлиир миэстэлэри арыйдыбыт, онно эмиэ икки аан оҥоттордубут. Урукку өттүгэр ааннарбыт эргэрэн, тастан үрэ турар эбит буоллахтарына билигин хапытаалынайдык оҥоһулунна.
Саалбыт муостата, истиэнэтэ үрэр буолан, саҥаттан итиини тутар үлэлэр оҥоһуллуннулар уонна кырыыһабытыгар итиини таһаарбат туһугар барытын көрөннөр бүөлээтилэр. Сыанаҕа дьон түһэригэр-тахсарыгар табыгастаах гына, сыана ортотугар киэҥ-куоҥ саҥа кирилиэс оҥордулар. Манна Эдуард Эдуардович Слепцовка махталбытын тиэрдэбит, түргэн-тарҕан туттунуулаах уус уол эбит, дууһатын ууран туран кулууппутун өрөмүөннээтэ .
Кинобудкабыт анныкы истиэнэтэ барыта кырааска уонна сыппарыйан турарын, кэлэн үлэлии сылдьар биригээдэ салайааччыларын Сафаров Махмадгафор Саламович кытта дуогабардаһан өрөмүөннэттибит. Кинилэр фойеттан кинобудкаҕа тахсар ааны, кинобудкабыт смотробуойун дьөлөн биэрдилэр.
Быйыл кинобудкабытын үлэҕэ киллэрдибит, онно ититэр ситимин, уотун барытын саҥаттан таттардыбыт, уоппутун барытын Сергей Сергеевич Аммосов оҥорон биэрдэ. Ону тэҥэ, ирдэбилинэн баһаарынай сигнализация барытыгар баар буолуохтаах. Маны барытын бэйэбит олохтоох киһибит, “Безопасность” диэн тэрилтэлээх Михаил Николаевич Тарабукин аҕыйах күн иһигэр барытын тардан биэрдэ. Түгэнинэн туһанан, бу дьоммутугар кэлэктииппит аатыттан махталыбытын тиэрдэбит.
Үөһээ биир хоско студия звукозаписи баар буолла, Колесов Владислав Васильевич үлэлэтиэҕэ. Үлэ усулуобуйата тэриллэн үлэбит өссө тупсуохтаах, туох баар аппаратурабыт, кинотеатрбыт проектора, уоппут-күөспүт барыта кинобудка үрдүттэн салайтаран үлэлиэҕэ, бэйэбит уолбут уопуттаах, уһун кэмҥэ үлэлээбит Александр Викторович Ефимов үлэлиир миэстэтэ оҥоһуллунна.
Маны таһынан, балаҕаммытын сөргүтэн үлэҕэ киллэрээри, быйыл саас кэлэктиибинэн ыраастаабыппыт, Владислав Колесов, Александр Ефимов, Василий Поисеев кырыыһатын, түннүктэрин барытын бэйэлэрэ оҥордулар. Маны таһынан кулууппут түннүктэригэр эбээнни тыыннаах араамалары быһан ииллилэр, ааннар кирилиэстэрин, киирии ааммытыгар баар пандуһу сөргүтэн, тупсаҕай гына оҥорон биэрдилэр.
Кэрэ аҥардарбыт сайын устата кырааска үлэтигэр күүскэ үлэлээтилэр, сүрдээх улахан көмөнү «Волонтер” лааҕыр оҕолоро оҥордулар, кинилэргэ кулууп үлэһиттэрин ааттарыттан улахан махталбытын тиэрдэбит.
Быйыл сүрдээх элбэх субуотунньуктары ыыттыбыт, былыргы бөҕү-сыыһы ыраастааһын үлэлэрэ, маннык улахан өрөмүөн кэнниттэн дьон олорор устууллара барыта быыл буолбуттар этэ, ону барытын сууйан-сотон биэрдилэр.
Бу үлэни барытын дьаһайааһын, матырыйаалларын, үлэһиттэрин булааһын, ыытылла турар үлэлэри хонтуруоллааһын барыта “МАО Ситим салайааччы Нохсоров Дмитрий Васильевич, бэйэтэ барытыгар тэбис тэҥҥэ сүүрэн-көтөн улахан үлэни ыытта.
Өрөмүөҥҥэ туттубут матырыйаалларбытын саас суолу баттаһан, олохтоох дьаһалта бүтүннүүтүн аҕалтарбыта, онон бу чааһыгар кыһалҕалары, мэһэйдэри көрсүбэтибит. Маннык улахан үлэ ыытылларыгар үппүтүн-харчыбытын олохтоох дьаһалта көрөн, элбэх үлэ ыытылынна диэн туран, түгэнинэн туһанан олохтоох дьаһалтабытыгар, баһылыкпытыгар Сергей Сергеевич Аликовка улахан махталбытын тиэрдэбит.
Сити курдук, этнокултуурунай кииммитигэр элбэх, улахан үлэлэр ыытылыннылар, онон кыһыҥҥы халлаан хайдах буоларыттан тутуллубакка, үлэлиир дьиэбит этэҥҥэ сылыйар ини диэн эрэнэбит.»
Марианна Слепцова