Тэрилтэ салайааччыларын мунньаҕар улуус баһылыгынан 2018-2023 сылларга үлэлээбит, СӨ олох-дьаһах коммунальнай хаһаайыстыбатын үтүөлээх үлэһитэ уонна бэтэрээнэ Гаврил Гороховка махтанан, төрөөбүт улууһун туһугар эҥкилэ үтүө суобастаахтык үлэлээбитин чиэстээн—бочуоттаан туран, атаарыы долгутуулаах түгэнэ буолла. 
«Быыбар түмүктэннэ, биэс сыл түргэн бэйэлээхтик ааста, киһи үлэлииригэр-хамсыырыгар олус кылгас болдьох эбит. Быыбар кыайыылааҕын Иннокентий Николаевиһы аҕа баһылык буолбутунан итиитик-истиҥник эҕэрдэлиибит!
Биэс сыл иһигэр улуус сайдарын туһугар сүрдээх үчүгэйдик үлэлээн кэллибит. Онон, салгыы саҥа талыллыбыт баһылык тула түмүллүҥ, сүбэлэһиҥ. «Сүгэ кыайбатаҕын сүбэ кыайар” диэн саха өс хоһооно баар. Мин үлэлиир кэммэр дьаһалтаҕа улахан кэпсэтиилэр буолаллара, киэһэ хойукка диэри мунньахтыырбыт, ол түмүгэр тэрилтэ салайааччылара бэйэлэрин хайысхаларынан туһунан бырагыраама оҥорон таһаараллара. Бары биир сүбэннэн биир киһи курдук үлэлээн үгүс үлэни ситистибит. Саҕаламмыт, үптэрэ-харчылара көрүллүбүт бырайыактар элбэхтэр, ону саҥа үлэҕэ киирбит хамаанда чиэстээхтик үлэҕэ киллэриэн наада уонна улууспут салгыы сайда, үүнэ-чэчирии турарыгар баҕарабын,» — диэн этэн туран Гаврил Гаврильевич биэс сыл устата бииргэ үлэлээбит тэрилтэ салайааччыларыгар махтанан туран, «Үйэ” сурунаалы бэлэх туттарда.
Саҥа талыллыбыт баһылык Иннокентий Стручков Гаврил Гаврильевич үгүс үлэни ыыппытын бэлиэтээн туран, бу үлэлэри салгыахпыт диэн эттэ, итиэннэ СӨ үрдүкү салалтатын таһымнаах махтал суруктары үөрүүлээх быһыыга-майгыга туттарда. Ол курдук, СӨ олохтоох бэйэни салайыныы боппуруостарыгар Департамент, СӨ Бырабыыталыстыбатын бэрэссэдээтэлин солбуйааччыта Ольга Балабкина, СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников оройуон, өрөспүүбүлүкэ сайдыытыгар кылаатын, үтүө суобастаах үлэтин иһин истиҥ-иһирэх тыллардаах махталлар суруктары уонна СӨ суол-иис уонна транспорт министиэристибэтин «СӨ транспортнай комплексын туйгуна” түөскэ кэтиллэр бэлиэни тутан үөрдэ, долгуйда. Иннокентий Николаевич Гаврил Гаврильевичка улуус социальнай-экономическай сайдыытын туһугар дириҥ билиитин, салайар талаанын, күүһүн-уоҕун, сатабылын ууран туран үлэлээбитин үрдүктүк сыаналыырын биллэрдэ итиэннэ улуус дьаһалтатын аатыттан махтал суругу кытары “Эбээн-Бытантай улууһун бочуоттаах олохтооҕо” үрдүк ааты туттарбыта икки бүк үөрүүлээх түгэн буолла.
Түгэһиир нэһилиэгин баһылыга Сергей Аликов нэһилиэк Сэбиэтин дьокутааттатын аатыттан «Түгэһиир нэһилиэгин бочуоттаах олохтооҕо”, Дьарҕаалаах орто оскуолатын дириэктэрэ Сергей Михайлов нэһилиэк баһылыга Лев Горохов уонна оскуола кэлэктиибин аатыттан махтанан тураннар, «Дьарҕаалаах нэһилиэгин бочуоттаах олохтооҕо” үрдүк бэлиэлэри туттардылар.
Үөрэҕирии салайааччыта Петр Потапов улуустааҕы үөрэҕирии салалтатын аатыттан барҕа махталын тириэртэ итиэннэ «Үөрэхтээһин муниципальнай систиэмэтигэр кылаатын иһин” түөскэ кэтиллэр бэлиэни дохсун ытыс тыаһын доҕуһуолунан туттарда.
Сити курдук, Гаврил Гаврильевиһы атаарыы истиҥ-иһирэх, сылаас эйгэҕэ олус долгутуулаахтык буолла. Биэс сыл устата бииргэ үлэлэспит тэрилтэ салайааччылара үгүс махтал тылларын, баҕа санааларын, алгыстарын эттилэр.