Түгэһиир нэһилиэгэр бу күннэргэ эдэр ыччаттар мунньахха муһуннулар. Бэбиэскэҕэ ыччат Сэбиэтин састаабын талыы, 2024-2025 сс. спортивнай уонна култуурунай тэрээһиннэр календарнай былааннарын бигэргэтии.
Кэлиҥҥи сылларга улуус киинигэр эдэр ыччаттар түмсүүлэрэ хайдах эрэ уота-күөһэ суох этэ. Быйылгыттан улуус дьаһалтатын иһинэн үлэлиир ыччат бэлиитикэтигэр уонна спортка исписэлииһинэн Ольга Горохова ананан, эдэрдэр хамсааһыннара хаттаан сөргүйэн эрэр. Бэлиэтээн эттэххэ, бу соторутааҕыта, алтынньы ыйга Айар дьиэ аактабай саалатыгар бэрт сонун тэрээһин – «Garage SALE” атыы-тутуу ыччаттар күүстэринэн бэрт сэргэхтик тэриллэн, үгүс олохтоохтор биһирэбиллэрин ылбыта.
Салгыы ыччаттар оҕо спортивнай оскуолатыгар күргүөмүнэн мустаннар, мунньахтаан, бастатан туран, ыччат сэбиэтин бэрэссээдээтэлин таллылар. Ол курдук, Вера Бочкарева Сэбиэт бэрэссэдээтэлинэн ананан, онтон бэрэссэдээтэли солбуйааччынан Яков Горохов буолан, бары түмсүү кыттыылаахтарын күүһүнэн сотору кэминэн ыччат хамсааһына эдэрдии эрчимнээхтик үлэлиэҕэ диэн бүк эрэнэбит.
Онтон чугастааҕы, ол эбэтэр сэтинньи, ахсынньы ыйдарга буолар тэрээһиннэри оҕо спортивнай оскуолатын дириэктэрэ Мария Афанасьева сырдатта. Ол курдук, спорт эйгэтигэр буулдьанан ытыы, хомуур хапсаҕай күрэхтэрэ буолаллара күүтүллэр.
Сардаана Копырина