Өрөспүүбүлүкэбитигэр төрүт дьарыгы сайыннарар сыаллаах «Эдэр табаһыт” бырагыраама 2020 сылтан ситиһиилээхтик олоххо киирэн, 35 саастарыгар диэри эдэр табаһыттар олорор усулуобуйаларын тупсаралларыгар көмө харчы ылаллар. Быйыл төлөбүр кээмэйин икки мөлүйүөн солкуобайга диэри улаатыннардылар, онуоха бу сыалга 28 мөл. солк. үп-харчы көрүллүбүт. Эбээн-Бытантай улууһуттан бу маннык көмөнөн быйыл икки эдэр табаһыт туһанна.
«Бүгүҥҥү ситиһиибит диэн биһиги улууспутуттан бу маннык социальнай төлөбүрү икки эдэр табаһыттарбыт – «Кочевник” ородобуой община табаһыта Арсен Слепцов уонна ИП КФХ “Старостина Д.Е.” табаһыта Николай Старостин бырагыраамаҕа киирэн, иккилии мөлүйүөн сууммалаах көмөнү ыллылар,» — диэн тыа хаһаайыстыбатын салайааччыта Лена Бочкарева сырдатта.
Санатар эбит буоллахха, төлөбүр ирдэбилинэн дьиэтэ-уота суох 18 саастарын туолбут, 5 сылтан итэҕэһэ суох таба иитиитигэр үлэлээбит эдэр табаһыттарга бэриллэр, маныаха өссө 5 сыл үлэлииргэ дуогабардаах буолуохтаах. Төлөбүр эдэр табаһыт сүрүн үлэтин миэстэтигэр олорор дьиэни атыылаһыыга эбэтэр туттарга ананар. Урут төлөбүр кээмэйэ 1 мөл. солк. этэ. Төлөбүрү эдэр табаһыт олорор дьиэни тутууга, олорор дьиэ атыыласпытын төлөбүрүн толуйууга бас билиитигэр ыларыгар туһаныан сөп.