Эбээн Бытантай улууһун ыҥырыытынан Лилия Захаркина – Төлкө уонна кэргэнэ Александр Кривошапкин – Сыдьаан бүгүн, ол эбэтэр олунньу 29 күнүгэр биһиги дойдубут дьонун-сэргэтин кытта үлэлэһэ кэллилэр.
Кинилэр Конфедерация Целителей России чилиэннэрэ, «Алгыс тула» түмсүү тэрийээччилэрэ, салайааччылара, Дьокуускай куоракка бэйэлэригэр анал балаҕан туттан үлэлээбиттэрэ хас да сыл буолбут. Кинилэр өбүгэ күүһүнэн алгыс, илбийии оҥороллор, дьону традиционнай, китайскай медицинэнэн эмтииллэр, массажтыыллар, уйулҕаҕа үлэлэһэллэр, уһуйааннары ыыталлар.
Лилия Захаркина -Төлкө дьоҥҥо алгыһа, көмөтө, өбүгэ кыаҕын, билиитин тириэрдэр күүһэ Саха сиригэр эрэ буолбакка бүтүн Арассыыйа, өссө атын омук дойдуларыгар кытта тахсан биһирэнэр, ытыктанар.
Александр Кривошапкин — Сыдьаан араас традиционнай ньыманнан кэргэнэ Төлкөлүүн тэҥҥэ дьиэ — кэргэнинэн эмтииллэр, илбийэллэр, чөллүүллэр.
Кинилэр үлэлэрэ хайдах хайысхалаах ыытылларын, бырагыраамалара хайдаҕын, хас күҥҥэ кэлбиттэрин билээри бэйэлэрин кытта олорон эрэ сиһилии кэпсэттибит.
— «Биһиги бу дойдуга, сиргэ-уокка Саккырыыр сиригэр анаан-минээн үлэлии-хамсыы, Алгыс түһэрэ, сири кытта ситимнэһэ, айылҕалыын бииргэ буолан олохтоох дьону кытта алтыһа кэллибит. Бу сир-дойду көҥүллээтэҕинэ улахан Алгыс түһүөҕэ Саккырыыр сиригэр. Бу Алгыска киһи бэйэтин туругун, өйүн — санаатын, кыһалҕатын, эрэйин ыыта, сырдыкка үчүгэйгэ, олох суолтатын өйдөбүлэ дьэ, бу Алгыс нөҥүө барыта барар. Уокка сүгүрүйүү, сиэр-туом оҥоһуллан, олохтоох олорбут дьоннорго алтыһан ааспыт бу сир-уот дойду сиригэр үҥэн сүктэн барыта оҥоһуллар.
Биһиги балачча элбэх улуустарынан, сирдэринэн сырыттыбыт, элбэх дьону кытта алтыһан, үлэлээтибит. Мин 20-тэн тахса сыл буоллум маннык дьарыктаммытым, ханна да бэйэбин рекламалаан таһаарбатаҕым, миигин куйаар ситимигэр булбаккын, онно ханна да суохпун. Билигин биһигини хайдах булан ыҥырдылар диир буоллахха, былырыын Дьааҥы сиригэр Баатаҕай нэһилиэгэр үлэлии сылдьыбыппыт, ону истэннэр анаан-минээн ыҥырбыттарыгар, Эбээн Бытантай сирэ-уота ылынна диэммит, үөрэ-көтө кэллибит.
Уонна дьэ, бу 10 хонук тухары бу киһи эмтэниитэ, этин-сиинин, өйүн-санаатын, чөл туругун уһугуннаран баран дьэ, аны илбиллэн этин-сиинин оройуттан, атаҕар тиийэ ойбоннорун (киһи 21 ойбонноох диэн сахалыы этии) бүтүннүү аһан, илиититтэн-атаҕыттан, хас биирдии тымырдара, иҥиирдэрэ хам тута сылдьар ис туруктара дьэ, бу маны барытын ыытан, босхолоон күүстээх үлэ барыахтаах.
Кэлиҥ, билсиһиҥ, көрсүҥ, диэн аналлаах бастакы көрсүһүү күммүтүн сарсын 12 чаастан саҕалыахпыт күн халлаан оройугар турар кэмигэр, Айар дьиэ аактабай саалатыгар күүтэбит.
Ол кэннэ кулун тутар 2, 3, 4 күннэригэр үс күн устата киэһэ 19.00 чаастан уһуйаан ыытыаҕым. Ол аата бэйэни иһиллэнии, ааспыты ыытыы, ыарахан санаалартан босхолонуу, бэйэни ылыныы, алы гыныы кэпсэтиилэрэ, үөрэтиилэрэ буолуохтара. Эмтээһин чааһын Сыдьаан, Сардана Сыроватская дьиэтигэр-уотугар наадыйар дьону кытта үлэлиэҕэ.»
Марианна СЛЕПЦОВА