Дьокуускай куоракка «Саха сүөһүтэ” хааһына тэрилтэ 5 сыллаах үбүлүөйдээх тэрээһиннэрэ буоллулар.
«Саха сүөһүтэ” тэрилтэ күн бүгүн 8 салаалаах. Эбээн Бытантай, Амма, Ньурба, Үөһээ Бүлүү, Горнай, Нам улуустарыгар. Бу биэс сыл иһигэр хороҕор муостаах ахсаана 2 төгүл үрдээтэ, сүөһү үлэһиттэригэр сөптөөх үлэлиир усулуобуйа тэрилиннэ. Бу сыллар тухары 900 тахса миэстэлээх 9 хотон тутулунна. Билигин бу тэрилтэҕэ 1275 төбө саха сүөһүтэ, ол иһигэр 460 ынах сүөһү иитиллэн турар.
«Саха сүөһүтүн дьылҕата судургута суох, биһиги салаабытыгар, наукаҕа уонна салалтаҕа урут да, билигин да мындыр өйдөөх дьон баар буоланнар ураты боруода сүөһүбүт симэлийэн-сүтэн хаалбата. Кинилэр өҥөлөрүнэн билигин хонуу муҥунан хороҕор муостаах төрүт сүөһүбүт мэччийэр, бу сүҥкэн бэлэҕи биһиги инники көлүөнэлэрбитигэр хаалларар кыахтанныбыт», — диэн тэрилтэ дириэктэрэ Александр Артемьев бэлиэтээтэ.
Үбүлүөйдээх тэрээһин биир долгутуулаах түгэнинэн «Саха сүөһүтэ — норуот баайа» («Якутский скот — достояние народа саха») кинигэ сүрэхтэниитэ буолла. Кинигэҕэ өбүгэлэрбит үйэлэргэ иитэн кэлбит саха боруода сүөһүтүн харыстыыр уонна элбэтэр соруктаах тэрилтэ 5 сыллаах үлэтин түмүгүн таһаардылар.
Саха ынаҕа тыыннаах ордон хаалбыт улууһунан Эбээн Бытантай буолар. Бу мантан саха норуотун төрүт сүөһүтэ иккистээн сайдар суолга турбута диэн хааһына тэрилтэтин салайааччылара бэлиэтээтилэр. Онон, Эбээн Бытантай улууһуттан үбүлүөйдээх тэрээһиҥҥэ кыттыыны ылбыт биһиги дьоммут — тыа хаһаайыстыбатын наукатын кандидата Иннокентий Аммосов, улуустааҕы тыа хаһаайыстыбатын управлениетын салайааччыта Лена Бочкарева, «Саккырыыр» отделениеттан управляющай Петр Слепцов уонна ыанньыксыт Сахалина Роббек, «Кустуур» отделениеттан управляющай Максим Аммосов уонна сүөһү көрөөччү Петр Горохов күүтүүлээх күндү ыалдьыт буоллулар.
«Эбээн Бытантай дьонугар махталбыт улахан. Кинилэр саха сүөһүтүн хаалларан, биһиги күн бүгүн омук быһыытынан ураты сүөһүлээхпит. 5 сыл устата дьон үлэлиир усулуобуйатын тупсарыыга үгүс үлэ ыытылынна. 9 отделениеттан икки отделение «Кустуур» уонна «Кылыс» эрдэ, сэбиэскэй сойуустан хаалбыт хотоҥҥо үлэлии тураллар. Инникитин Кустуурга уонна Маҥараска саҥа хотон тутулларын туһугар үлэ ыытыллар», — диэн бэлиэтээтэ «Саха сүөһүтэ» тэрилтэ дириэктэрэ Александр Артемьев.
Үтүө суобастаах, бэриниилээх үлэлэрин иһин РФ Федерацияҕа Сэбиэтин махтал суругунан управляющайдар Максим Аммосов уонна Петр Слепцов наҕараадаланнылар.
Тыа хаһаайыстыбатын сайыннарыыга кылаатын иһин Ил Түмэн Тыа сирин уонна аграрнай бэлиитикэҕэ сис кэмитиэтин Бочуотунай грамотатын Сахалина Роббек тутта.
Тэрилтэ салалтата ыраахтан кэлбит туруу үлэһит дьонноругар тэрээһини киэргэппиттэригэр махталларын биллэрдилэр.
Бу туһунан «Саха сүөһүтэ” хааһына тэрилтэ телеграм-ханаалыгар суруллар.