Эбээн-Бытантай улууһун оҕолоро олус да талааннаахтар! Аҥардас тустуук уолаттарбыт сотору-сотору ситиһиилэринэн, кыайыыларынан-хотууларынан үөрдэллэр.
Бу күннэргэ 2012-2013 с.т. уолаттарга көҥүл тустууга Дьокуускай куорат Первенствота буолла. Күрэхтэһиигэ 5№-дээх ДЮСШ аатыттан киирбит, Дьарҕаалаах нэһилиэгиттэн төрүттээх Диас Сергеев 30 киилэҕэ диэри ыйааһыҥҥа 1 миэстэни ситистэ уонна «Турнир бастыҥ бөҕөһө” ааты ылла. Онтон Дьокуускай куорат 20№-дээх оскуолатын 6 кылааһын үөрэнээччитэ, эмиэ биһиги оҕобут Арчылан Горохов 57 киилэҕэ диэри ыйааһыҥҥа 2 миэстэни ылла! 
Күрэхтэһиигэ уопсайа 189 кыттааччы кииристэ. Диастан уонна Арчылантан ураты Эбээн-Бытантай улууһун оҕолоро Эрсаан Сыроватский, Кирилл Петухов эмиэ бэйэлэрин кыахтарын-күүстэрин холоннулар.
Бу курдук оҕолорбут төрөөбүт дойдуларыттан силистэнэн-мутуктанан, киэҥ туонаҕа тахсан, дьоҕурдара, талааннара өссө чочуйуллан, үүнэн-сайдан иһэллэрэ олус үөрүүлээх. Инникитин даҕаны ситиһиилэр кэлэ турдуннар диэн алгыыбыт.
Манна даҕатан эттэххэ, үгүс көлүөнэ тустуук уолаттарга аҕаларын, убайдарын кэриэтэ буолбут, бастакы олуктарын уурбут тренердэрэ Петр Стручков өҥөтө улахан. Кини таһаартаабыт уолаттара улахан көбүөргэ тахсан, улууспут аатын дорҕоонноохтук ааттаталлар. Онтон Петр Петрович хас биирдии иитиллээччитин ситиһиититтэн истиҥник үөрэр уонна хаһыат нөҥүө биир дойдулаахтарыгар мэлдьи сырдатар.
Сардаана Копырина