Эбээн-Бытантай улууһугар түргэнник ситэр салаа сайдар

Эбээн-Бытантай улууһугар быйыл 490 куурусса, 4 сибиинньэ оҕото түҥэтилиннэ. Ол иһигэр Кустуурга 115 куурусса, 2 сибиинньэ, Дьарҕаалаахха 114 куурусса ол күн тута уу көлөтүнэн айаннаан тиийдилэр.
Аартыка улуустарыгар түргэнник ситэр салаа сайдан иһэриттэн кытыы сытар Дьарҕаалаах нэһилиэгин олохтоохторо үөрэллэр уонна санааларын үллэстэллэр.

Саргылана Иванова:

  • Мин былырыын 10 куурусса ылан иитэммин сөбүлээтим. Өссө эбии быйыл 10 кууруссаны ыллым. Биһиги курдук ыраах сытар нэһилиэккэ түргэнник ситэр салаа кыылларын, көтөрдөрүн аҕалаллара олус үчүгэй!

Марианна Корнилова:

  • Биһиги дьоммун кытта быйыл тыа хаһаайыстыбатын салаатынан кууруссаҕа, сибиинньэҕэ сайаапка ылабыт диэбиттэригэр 30 төбө кууруссаҕа суруттарбыппыт. Бэс ыйын 20 күнүгэр 27 кууруссаны биэрбиттэрэ, 3 кууруссабыт уһун суолу тулуйбакка өлөн хаалбыттара.

Түргэнник ситэр салааны сайыннарар, тарҕатар бырагыраама биһиги улууспутугар үлэлиирэ олус үчүгэй. Бэйэ кууруссатын сымыыта минньигэс даҕаны!

Саргылана, Петр Петровтар, элбэх оҕолоох дьиэ кэргэн:

  • Биһиги ыал саҥа куурусса иитэн саҕалаан эрэбит. Көтөрдөрбүт туруктара үчүгэй. Билигин айаннаан кэлбит буоланнар сымыыттара аҕыйах. Саҥа аһыыр буоллулар. Уопсайа 32 төбөлөөхпүт.

Биһиги дьиэ кэргэн 4 оҕолоохпут. Оҕолор бэйэлэрэ киирэн күннээҕи сымыыты үөрэ-көтө хомуйаллар.

Дьарҕаалаах нэһилиэгин тыа хаһаайыстыбатын исписэлииһэ Матрена Баишева нэһилиэнньэттэн сайаапка хомуйан, 114 кууруссаны 10 ыал ылла диэн сырдатта. Бу аҕыйах нэһилиэнньэлээх кытыы нэһилиэккэ баһаам элбэх!

Онтон Кустуур нэһилиэгэр быйыл 115 кууруссаны, 2 сибиинньэ оҕотун 16 ыал сайаапканан тутаннар үөрүүлэрэ үксээтэ.

«Кыһыҥҥы суол баарына, саас аһылыктара кэлбитэ. Улуустааҕы тыа хаһаайыстыбатын салалтатыгар, олохтоох дьаһалтаҕа, уу көлөтүнэн тиэйэн аҕалбыт уолаттарга махталбытын тиэрдэбит,” — диэн тыа хаһаайыстыбатын исписэлииһэ Анна Слепцова махтанна.

Эбээн-Бытантай улууһун олохтоохторо тыа сирин кэлимник сайыннарыы бырагыраамата өрөспүүбүлүкэбитигэр тиһиктээхтик барарын бэлиэтииллэр.

Сардаана Копырина