Эбээн-Бытантай улууһугар култуура киинигэр Иннокентий Стручков баһылык солотугар киирэр сиэрэ-туома ыытылынна. Саҥа талыллыбыт баһылыгы эбээн норуотун сиэрин, култууратын, фольклорун киэҥ эйгэҕэ тарҕатар «Аянеса», «Генулчан», «Үпэндьэл» уус-уран кэлэктииптэр эбээннии таҥастаах тыыннаах көрүдүөр буолан алҕаан көрүстүлэр.
Салгыы үөрүүлээх тэрээһин Президиумугар бочуоттаах ыалдьыттар ыҥырылыннылар: Саха Өрөспүүбүлүкэтин транспортка уонна суол хаһаайыстыбатыгар миниистирин бастакы солбуйааччыта Анатолий Потапов, Эбээн-Бытантай национальнай улууһун муниципальнай тэриллиитин баһылыгынан 2019-2023 сылларга үлэлээбит, Аллараа-Бытантай нэһилиэгин бочуоттаах олохтооҕо, Саха Өрөспүүбүлүкэтин олох-дьаһах хаһаайыстыбатын эйгэтин үтүөлээх үлэһитэ, Саха Өрөспүүбүлүкэтин олох-дьаһах коммунальнай хаһаайыстыбатын бэтэрээнэ, бэйэни салайыныы бочуотунай бэлиэ хаһаайына Гаврил Горохов, Саха Өрөспүүбүлүкэтин –«Саха сүөһүтэ” генфонда хааһына тэрилтэтин салалтатын аатыттан зоотехник Светлана Слепцова, Түгэһиир нэһилиэгин муниципальнай тэриллиитин баһылыга Сергей Аликов, Үөһээ-Бытантай нэһилиэгин муниципальнай тэриллии баһылыга Лев Горохов, Аллараа-Бытантай нэһилиэгин муниципальнай тэриллии баһылыга Роберт Колесов, Эбээн-Бытантай улууһун ытык кырдьаҕаһа, үлэ-тыыл бэтэрээнэ Ольга Егоровна Слепцова, Эбээн-Бытантай улууһун бочуоттаах олохтооҕо, үлэ-тыыл бэтэрээнэ, бэтэрээннэр Сэбиэттэрин бэрэссэдээтэлэ Семен Семенович Андросов, Саха Өрөспүүбүлүкэтин үөрэҕириитин туйгуна, “Үпэндьэл” бөлөх салайааччыта Елена Львовна Горохова, Эбээн-Бытантай улууһун бочуоттаах олохтооҕо, үлэ бэтэрээнэ, Саха Өрөспүүбүлүкэтин энергетикатын бэтэрээнэ, оройуон сэбиэтин депутата Виктор Алексеевич Горохов, Саха Өрөспүүбүлүкэтин үөрэҕириитин туйгуна Марианна Иванова, Эбээн-Бытантай национальнай улууһун эдэр ыччаттарын, спортсменнарын ааттарыттан оҕо спортивнай оскуолатын дириэктэрэ Мария Афанасьева, Түгэһиир нэһилиэгин аҕалар сүбэлэрин бэрэссэдээтэлэ Виктор Горохов. 
Аҕа баһылык аатын сүкпүт Иннокентий Николаевич олоҕун, үлэтин оҥкулларын туһунан бар дьоҥҥо дьоһун тэрээһини ыытааччылар Нарыйа, Дмитрий Андросовтар билиһиннэрдилэр.
Үрдүк эппиэтинэстээх солону сүкпүт баһылык Иннокентий Стручков андаҕар тылын этэн туран бар дьонугар, төрөөбүт сиригэр-уотугар бэриниилээҕин, бииргэ түмсүүлээхтик үлэлиир баҕалааҕын эттэ. 
Иннокентий Николаевичка Эбээн-Бытантай национальнай улууһун баһылыгын мэҥэ бэлиэтин Эбээн-Бытантай национальнай улууһун муниципальнай тэриллиитин баһылыгынан 2019-2023 сылларга үлэлээбит Гаврил Горохов үөрүүлээх быһыыга-майгыга туттарда.
Тэрээһиҥҥэ ыҥырыылаах ыалдьыттар, тэрилтэлэр салайааччылара, кэлэктииптэр бэйэлэрин эҕэрдэ тылларын, баҕа санааларын эттилэр. Ону тэҥэ СӨ Ил Дархана Айсен Николаев, олоҕу-дьаһаҕы хааччыйар министиэристибэр салайааччыларын эҕэрдэ телеграммаларын ааҕан иһитиннэрбиттэрэ дохсун ытыс тыаһынан доҕуһуолланна. 
Эбээн-Бытантай национальнай оройуонун тэриллии баһылыгын дуоһунаһыгар киирэр үөрүүлээх тэрээһин сиэрэ-туома үтүө үгэс быһыытынан эҕэрдэ нүөмэрдэринэн, ырыанан-тойугунан түмүктэннэ.