Бу күннэргэ «Триумф» спортивнай киин тигинээн олордо. Олимпийскай чөмпүйүөн, аан дойду үс төгүллээх чөмпүйүөнэ, ССРС спордун үтүөлээх маастара Павел Павлович Пинигин чиэһигэр 16-гар диэри саастаах уолаттарга көҥүл тустууга Бүтүн Арассыыйатааҕы аһаҕас турнир уонна 18-гар диэри саастаах уолаттарга көҥүл тустууга норуоттар икки ардыларынааҕы таһымнаах күрэхтэһиилэр буоллулар.
Эбээн-Бытантай улууһун кыра бөҕөстөрө улахан көбүөргэ кимиилээхтик кииристилэр.
«Сүрдээх улахан таһымнаах, долгутуулаах күрэхтэһиилэр буолан аастылар. Ох курдук дьарыктаах тэбис-тэннэ кииристибит. Оҕолорбут бары – кыралар, улахаттар бэрткэ туһуннулар, маладыастар!
Эрсан Федоров норуоттар икки ардыларынааҕы көҥүл тустууга 45 киилэ ыйааһыҥҥа туһунна. Уолбут саҥа улахан көбүөргэ таҕыста диэтэххэ бэйэтигэр эрэллээхтик, долгуйбакка киирсэн бастакы сүрэхтэниитин ааста. Забайкалье уолугар очконон хоттордо, ол бөҕөспүт 5-с миэстэҕэ тигистэ. Онтон Эрсан 15 оҕоттон 11-с миэстэ буолла, онон ол да улахан ситиһии.
Ерема Рожин маладьыас! Бүтүн Арассыыйатааҕы турнирга аан маҥнай кыттан, 27 оҕоттон 9-с миэстэ буолла.
Айхал Свинобоев 37 оҕоттон 31-с миэстэ, Алеша Устинов 37 оҕоттон 23-с, Павлик Слепцов 37 оҕоттон 27-с, Эрсан Сыроватский 38 оҕоттон 7-с, Вася Сыромятников 40 оҕоттон 13-с, Влад Слепцов 44 оҕоттон 21-с, Валера Повов 44 оҕоттон 22-с, Айысхан Сыроватский 20 оҕоттон 12-с миэстэ буоллулар. Көрөргүт курдук, уолаттарбыт инники күөҥҥэ сылдьаллар. Онон, бу тэтиммитин, дьарыкпытын ыһыктыбакка эрэ өссө да иннибитигэр кыайыылар-хотуулар баар буолуохтара диэн бигэ эрэллээхпит, оҕолор бары маладьыастар, киэн туттабыт!
Бу күрэхтэһиигэ балтыбыт Христина Стручкова уола, бырааппыт Диас Сергеев 2 миэстэ буолла! Биир дойдулаах оҕобут туһугар олус үөрдүбүт, өссө да кыайыыны-хотууну баҕарабыт,» — диэн Христина Стручкова күрэхтэһии түмүгүн сырдатта.
Сардаана Копырина