Усуйаана Депутатскайыгар Саха Өрөспүүбүлүкэтигэр Судаарыстыбаннай баһаары утары сулууспа тэриллибитэ 15 сылыгар Спартакиада ыытылынна. Манна Дьааҥы, Усуйаана уонна биһиги улуус, идэлэригэр уһулуччу кыахтаах баһаарынайдара күөн көрүстүлэр. Спартакиада күрэхтэрэ спортивнай көрүҥнэртэн уратыта диэн, идэҕэ туһаныллар, ирдэнэр соруктары толруу буолан икки бүк ыарахан уонна тыҥааһыннаах. Биһиги улууспут хамаандата манна эрдэттэн бэлэмнэнэн, үчүгэйдэртэн үчүгэйдэрин талан кытта барбыттара. Бу туһунан Эбээн Бытантайдааҕы Баһаарынай чаас начаалынньыга Иван Стручков кэпсээтэ.
- Усуйаана биһигиттэн балайда ыраах буолан, сэрэдэ күн айаннаан бээтинсэҕэ тиийбиппит. Олохтоохтор наһаа үчүгэйдик көрүстүлэр, спортивнай оскуолаҕа олохтооннор, күҥҥэ үстэ тото-хана аһаттылар. Күрэхтэр боруоста тыҥааһыннаахтык ыытылыннылар. Күрэхтэр барыта идэ ирдиир кыаҕын көрдөрүү быһыылаахтар этэ. Холобур, “Надевание боевой одежды и снаряжения пожарного”, “Закрепление спасательной веревки за конструкцию”, “Пожарный кросс-фит” уонна волейбол, биһиги бэлэммит олох үчүгэй буолан түмүккэ кыайыылаах буоллубут, уолаттарым маладьыастар.
Хорсун Баһаарынайдарбытыгар дьоһун ситиһиилэринэн итии – истиҥ эҕэрдэ! Былырыын Дьааҥыга ыытыллыбыт Спартакиадаҕа биһиги хамаандабыт эмиэ бастаан, муҥутуур Кыайыылаах буолбуттара. Онон, баһаарынайдарбыт идэлэрин толору баһылыылларын өссө төгүл мэктиэлээтилэр.