Спорт эйгэтин сэҥээрээччилэр бары бэйэбит уолаттарбыт, кыргыттарбыт ханна тиийэн күрэхтэһэ, дойдуларын ааттата сылдьалларын бэрткэ диэн истэ-билэ, кинилэргэ ыалдьа сылдьаллара чахчы.
Билигин бу ыам ыйын 25-26 күннэригэр Владивосток куорат Русский диэн арыытыгар, XXIV төгүлүн ДВФУ ректорын бирииһигэр Бүтүн Арассыыйатааҕы тустуу буолан ааста. Манна Арассыыйа 13 эрэгийиэниттэн 200-тэн тахса спортсмен кэлэн тыҥааһыннаах хапсыһыыны көрдөрдүлэр.
Уһук Илиҥҥи бэдэрээссийэ бастыҥ улахан үрдүк үөрэҕин кыһата күрэҕи үгэс быһыытынан тэрийэн ыыппыта номнуо хас да сылын ааста. Бу турнир көҥүл тустууннан дьарыктанар устудьуоннарга «Арассыыйа спорт маастара» буолалларыгар кыах биэрэр.
Маннык сүдү улахан суолталаах күрэххэ бүтүн Саха өрөспүүбүлүкэтин аатыттан биһиги уолбут, Эбээн Бытантай улууһун ыччата Семен Стручков тиийэн 60 киилэ ыйааһыҥҥа бочуоттаах 2 миэстэни ылбыт ситиһиитэ биир дойдулаахтарын үөрдэр.
«Мин билигин «УОР» — «Олимпийскай саппаас үөрэҕэр» 4-с, бүтэһик кууруспун үөрэнэ сылдьабын. Бу улахан тэрээһиҥҥэ киирсээри эрдэттэн күүскэ дьарыктаммытым. Барыта үчүгэйдик ааста, мин ыйааһыммар 5 киһи баар этэ, тустуубут круговой буолан ыйааһыҥҥар баар бөҕөстөрү барыларын кытта киирсэҕин. Онно 2 миэстэни ылбыппыттан үөрэбин, өссө күүскэ дьарыктанарга күһэллэбин.
Маннык араас күрэхтэһиилэргэ барарбар, кэлэрбэр күүс-көмө буолар дьоммор Дмитрий Олегович Саввиновка, улууспут баһылыгар Иннокентий Николаевич Стручковка уонна бар дьоммор улахан махталбын тиэрдэбин.» — диэн сэмэйдик санаатын үллэстэр Семен Стручков.
Марианна СЛЕПЦОВА