Бүгүн, Аҕа дойду Дьоруойдарын күнүгэр улуус баһылыга Иннокентий Стручков айал байыаннай дьайыыга сылдьан олоҕун толук уурбут эдэркээн буойун Колесов Василий Николаевич кэргэнигэр Марианна Христофоровнаҕа «Эр санаа” уордьанын туттарда.
Тэрээһин Р.И. Шадрин аатынан Саккырыыр орто оскуолатыгар ыытылынна. Бэлиэ түгэҥҥэ оскуола бастыҥ үөрэнээччилэрэ дойдубут былааҕын үөһээ күөрэттилэр.
Ол кэннэ улуус баһылыга Иннокентий Стручков сэрии толоонугар олохторун толук уурбут буойуннар уонна дойду көмүскэлигэр сылдьар биһиги эр дьоннорбут бары дьоруойдар диэн бэлиэтээн туран, Колесов Василий Николаевич кэргэнигэр Марианна Христофоровнаҕа «Эр санаа” уордьанын туттарда.
Салгыы киин бэбилэтиэкэттэн Тамара Слепцова Аҕа дойду Дьоруойун күнүн сүнньүнэн ыытыллыбыт “Дьоруойдар биһиги ортобутугар” диэн уруһуй уонна оҥоһуктар күрэхтэрин кыайыылаахтарыгар грамоталары туттарда.
Түмүктүүр чааска оскуола үөрэнээччилэрэ илиилэрин түөстэригэр тутан туран, махтал уонна сүгүрүйүү тылларын эттилэр.
Сардаана Копырина