Бэс ыйын 1 күнэ – Оҕо көмүскэлин күнэ. Бу бырааһынньык хайдах төрүттэммитэй? Арассыыйаҕа Оҕо көмүскэлин күнүн быһыытынан биллэр эбит буоллаҕына, атын дойдуларга Норуоттар икки ардыларынааҕы оҕо күнүнэн ылыналлар.

Оҕо күнэ былыргы бырааһынньыктартан биирдэстэрэ. Бу бырааһынньыгы бэлиэтиир туһунан быһаарыыны 1925 сыллаахха оҕолор үтүө туруктаах буолууларыгар анаммыт Аан дойдутааҕы кэмпириэнсийэҕэ ылыммыттар. Тоҕо бэс ыйын 1 күнүгэр бэлиэтииллэрий? Оҕо күнүн тоҕо бэс ыйын 1 күнүгэр бэлиэтииргэ санаммыттара чопчу ыйыллыбат эрээри, сорох интэриниэт ситимнэргэ сурулларынан, 1925 сыллаахха Сан-Францискоҕа Кытай Генеральнай консула кытай тулаайах оҕолорун хомуйталаан ылан баран, Дуань-у цзе (драконнар бэстибээллэрин) тэрийбит. Ол тэрээһин бэс ыйын 1 күнүгэр ыытыллыбыт. Ону таһынан оҕо чэбдик туруктаах буолуутугар анаммыт кэмпириэнсийэ эмиэ ити күн сөп түбэспит. 1949 сыллаахха дьахталлар Норуоттар икки ардыларынааҕы демократическай федерацияларын Сэбиэтин сессиятыгар Москваҕа Оҕо көмүскэлин күнүн бэлиэтиир наадатын туһунан биир санааҕа кэлбиттэр. Саха сиригэр бу биир саамай сырдык, ыраас бырааһынньыгынан буолар. Өрөспүүбүлүкэ араас муннуктарыгар оҕолорго аналлаах тэрээһиннэри ыыталлар(куйаар ситимиттэн).

Эбээн Бытантай улууһун Түгэһиир нэһилиэгин оҕолоругар сүрдээх үчүгэй тэрээһини ЭКК “Гарпан”, Оҕо саас киинэ, полиция, социальнай харалта, оскуола, оҕо спортивнай оскуолата уонна да атын тэрилтэлэр бары биир сүбэннэн араас элбэх күрэхтэри, оонньуулары ыытаннар кырачааннарга үөрүүнү бэлэхтээтилэр.

«Хаарчаана” уһуйаан күрүөтүгэр оҕо-аймах киэргэнэн-симэнэн мустубуттарын киһи көрөн манньыйар, үөрэр.
Бу бэлиэ күнүнэн Түгэһиир нэһилиэгин баһылыга Сергей Аликов, үөрэҕирии салайааччыта Петр Потапов, улуус дьаһалтатын иһинэн үлэлиир социальнай бопуруостарга салайааччы Саргылана Петрова эҕэрдэ тыл этэн бырааһынньыгы арыйдылар.
Маны таһынан араас ылбаҕай ырыалары, тэтимнээх үҥкүүлэри нэһилиэкпит талааннаах оҕолоро көрдөрөн мустубут дьон сэҥээриилэрин, болҕомтолорун ыллылар.
Бу кэннэ күнүс 3 чаастан футболлуур былаһааккаҕа мини-футбол күрэҕин оҕо спортивнай оскуолатын кэлэктиибэ тэрийэн ыыттылар. Манна уопсайа 4 хамаанда күөн көрүстүлэр: “Реал”, “Гром”, “ПСЖ”, “Манчестер Юнайте” диэн ааттаннылар.
Бэрт сэргэх, тыҥааһыннаах киирсии кэнниттэн 1 миэстэни “Реал” хамаандата, 2 миэстэ “ПСЖ”, 3 миэстэ “Гром” ыллылар.
Анал аат хаһаайыттарынан буоллулар:
“Лучший вратарь”-Алеша Петров,
“Лучший бомбардир”-Степан Другин,
“Лучший защитник”-Ярик Слепцов,
“Технический игрок”- Слава Старостин.
“Оҕолор-олох сибэккилэрэ”диэн этии мээнэҕэ этиллибэт, оҕолорбут тустарыгар, инникилэригэр тугу оҥорорбут, туох кылаат киллэрэрбит ол барыта кинилэр хайдах дьон буола улааталлара биһигиттэн тутулуктаах. Биирдэ бэриллэр оҕо сааска үөрүүлээх түгэни сыллата улууспут тэрилтэлэрэ бэлэхтииллэрэ хайҕабыллаах.

 

Марианна СЛЕПЦОВА