Дьол уйата дьиэ кэргэнтэн саҕаланар

Быйылгы сыл Арассыыйаҕа Дьиэ кэргэн, Саха сиригэр Оҕо саас сылынан биллэриллибитэ. Дьиэ кэргэн сылыгар биһиги улууспутугар сокуонунан ыал буолуу төһө бэлиэтэннэ? Дьиэ кэргэттэргэ туох көмөлөр баалларый? Бу маннык ыйытыктарынан салайтаран туһааннаах тэрилтэлэр исписэлиистэрин кытта кэпсэттибит.

Елена Колесова, ЗАГС Эбээн Бытантайдааҕы салаата:

  • Быйыл биһиги улууспутун туһаайан эттэххэ, Баатаҕай-Алыытыгар үс ыал холбосто, өссө эбии төрдүс ыал сайабылыанньатын биэрбитэ, ыам ыйын 28 күнүгэр докумуоннарын ылаллар. Сыл саҕаланыаҕыттан ити курдук түөрт ыал баар буолла. Эдэрдэр дуо бары? –суох, 5 оҕолоох дьиэ кэргэн быйыл сокуонунан бигэргэттилэр. Үс эдэр дьон. Атын нэһилиэктэртэн билиҥҥитэ ыал буолуу сайабылыанньата киирэ илик.

Бастакы ыал регистрациятын хаһыат нөҥүө сырдатыллыбыта. Икки сылга биһиги улууспутугар аан бастакы ыал буолаллар. Аны эдэрдэр саҥа киирбит сокуонҥа олоҕуран 25 диэри саастаах буоллахтарына сертификат ылаллар, ону социальнай харалтаҕа баран сибидиэтэлистибэлэрин туоһу гынан сайабылыанньа суруйаллар.

Аэлита Сыроватская, социальнай харалта салайааччыта:

Социальнай харалта нөҥүө төлөбүрдэр бары дьиэ кэргэттэргэ оҥоһуллаллар. Холобур, «Дьиэ кэргэн» өрөспүүбүлүкэтээҕи ийэ хапытаала үһүс оҕоттон төлөнөр, өскөтүн оҕо 2011 с. тохсунньу 1 күнүттэн бэттэх төрөөбүт буоллаҕына; «Үйэ оҕолоро» 2022 с. тохсунньу 1 күнүттэн  оҕоломмут дьоҥҥо барыларыгар ананар; эрэгийиэннээҕи ийэ хапытаала 2019 с. тохсунньу 1 күнүттэн иккис оҕоломмуттарга бэриллэр.

Быйыл өссө биир уларыйыы, өйөбүл диэн, саҥа ыал буолбут 25 саастарыгар диэри эдэр дьоҥҥо 50 тыһ. солк. төлөбүр оҥоһуллар.

Маны таһынан дьиэ кэргэттэргэ социальнай хантыраак нөҥүө эмиэ көмө баар. Ону бастакы соруктаах табаардарга, аска-үөлгэ туттуохтарын сөп.

Үс уонна үстэн элбэх оҕолоох ыал сир учаастагын ылыыттан аккаастаннахтарына, 200 000 солк. харчынан ылаллар. Бу харчыны туһаныыга тус сыаллаах, хайысхалаах, ол эбэтэр 1 – дьиэ-уот усулуобуйатын тупсарыы, 2 – ититии ситимигэр олорор дьиэни холботуу, 3 — атыы-эргиэн дуогабарынан дьиэ туттарга сир учаастагын ылыы.

Дьиэ кэргэттэргэ социальнай харалта нөҥүө дьиэ коммунальнай өҥөлөрүгэр көмө суох, ону дохуоттара кыра буоллаҕына Субсидия агенствотын нөҥүө ылыахтарын сөп.

Сардаана Копырина