Ахсынньы 11 күнүгэр Өксөкүлээх Өлөксөй аатынан норуоттар доҕордоһууларын дьиэтигэр «Туундара уонна тайҕа дуораана-2024» XII эрэгийиэннээҕи аһаҕас бэстибээл-куонкурус ыытылынна.
Арассыыйаҕа Дьиэ кэргэн уонна Саха сиригэр Оҕо саас сылыгар туһуламмыт бэстибээл өрөспүүбүлүкэбит бары арктическай оройуоннарыттан, итиэннэ Магадан уобалаһыттан уонна Красноярскай кыраайтан 60 тахса артыыстары түмтэ.
Кыттааччылар икки ырыаны, биирэ хотугу аҕыйах ахсааннаах төрүт норуоттар, иккиһэ талбыт тылынан ырыалары толордулар.
Биһиги улууспутуттан бу бэстибээл-куонкуруска киэн туттар ылбаҕай ырыаһыттарбыт Владислав Колесов, Николай Иванов уонна Марианна Корнилова, итиэннэ Дьарҕаалаахтан «Нод асаткални» вокальнай ансаамбыл кыттыннар, бары үрдүк ситиһиилэннилэр. Ол курдук, тумус туттар ырыаһыппыт Владислав Колесов 1 истиэпэннээх Лауреат, Дьарҕаалаахтан Николай Иванов, Маринна Корнилова 3 истиэпэннээх Лауреат үрдүк ааттарын, «Нод асаткални» вокальнай ансаамбыл «За яркое и содержательное воплощение темы» дьүүллүүр сүбэ бэрэссэдээтэлин бирииһин ыллылар! 
“Туундра уонна тайҕа дуораана-2024» бэстибээл-куонкуруска кыттарга биһиги маҥнай сүүмэрдээһини ааһаммыт, бары гала-кэнсиэргэ киирдибит. Бэстибээлгэ тэйиччиттэн кыттыы көрүҥэ эмиэ баар эбит. Инникитин ити көрүҥҥэ кыттар табыгастаах эбит дии санаатыбыт, тоҕо диэтэр оннукка сыыспаккын, иккистээн-үһүстээн дубль оҥоруохха сөп. Онтон бу сыанаҕа туран саамай билэр ырыаҕар, муусукаҕар артистичность өттүгэр сыыһа туттан кэбиһиэххин сөп. Үчүгэйэ диэн бэстибээл-куонкурус сылын аайы ыытыллар, онон сыллата да кыттыахха сөп”, — диэн Владислав Колесов санаатын үллэһиннэ.
Киин куораппыт киэҥ туонатыгар хотугу сулустуу сандаарбыт, дьүкээбил уотунуу дьиримнээбит, кустуктуу күлүмүрдээбит ырыа куттаах биир дойдулаахтарбытын үрдүк ситиһиигитинэн эҕэрдэлиибит! Инникитин даҕаны төрөөбүт улууспутун ааттара туруҥ диэн алгыыбыт.
Сардаана Копырина