Табаны күһүҥҥү ааҕыы Эбээн-Бытантай улууһугар биир бастакынан саҕаламмыта. Күһүҥҥү хараал биир сүрүн соругар дьиэ табатын маркировкалааһын киирэр.
“Кочевник” ородобуой общинаҕа харааллааһын кэмигэр табалары биркалаатылар. Өссө да хараал бүтэ илик», — диэн Наталья Слепцова сырдатта.
Ону тэҥэ бэтэринэриийэттэн Мария Карманова эппитинэн, билиҥҥи туругунан 3 нүөмэрдээх ыстаадаҕа уонна урбаанньыт Зоя Григорьевна Колесоваҕа табалары биркалаатылар уонна хааннаатылар. Өссө да үлэ ыытыллар. Билигин «Турукан» ородобуой общинаҕа уонна 6 нүөмэрдээх ыстаадаҕа маркировка ыытыллар. 
Бэлиэтээн эттэххэ, тыа хаһаайыстыбатын уонна ас-үөл бэлиитикэтин министиэристибэтэ маркировкалааһын үлэтин бүттүүн ынах сүөһүгэ итиэннэ тэрээһиннээх хаһаайыстыбалар сылгыларыгар быйыл ахсынньы 1 күнүгэр диэри, кэтэх сылгыга 2025 сыл кулун тутар 1 күнүгэр диэри, дьиэ табатын 50 бырыһыанын бу дьыл ахсынньы 20 күнүгэр, хаалбыт аҥаарын эһиил балаҕан ыйын 1 күнүгэр диэри түмүктүүргэ соруктанар.
Биһиги улууспутугар күһүҥҥү ахсаан өссө да бүтэ илик, тэрээһиннээх хаһаайыстыбаларга харааллааһын бара турар. Чопчу дааннайдар ахсаан түмүгүнэн улуус хаһыатыгар уонна сетевой таһаарыыга сырдатыллыахтара.
Сардаана Копырина