“Тыа сирин эдэр үлэһитэ-2025” өрөспүүбүлүкэтээҕи күрэскэ Саккырыыр орто оскуолатын 10-с кылааһын үөрэнээччитэ Давид Другин кыайыылааҕынан таҕыста.
Бу күрэс үөрэнээччилэри үлэнэн иитиини сайыннарыыга уонна аграрнай идэлэри киэҥник тарҕатыыга туһаайыллар. Күрэскэ Арктика үс улууһун киллэрэн туран, 16 улуустан 56 үлэ киирбит. Ол түмүгүнэн бастыҥ оҕуруот аһын олордооччуну, отчуту, сүөһүнү иитээччини, табаны көрөөччүнү, механизаторы, балыксыты, экологы уонна рационализаторы таллылар.
Биһиги курдук киин сиртэн тэйиччи сытар хотугу улууска кыра оҕо саастарыттан үлэҕэ уһаарыллан тахсар ыччаттар үгүстэр. Быйылгы күрэс муҥутуур кыайыылааҕа, биһиги биир дойдулаах оҕобут Давид Другин эмиэ кыра сааһыттан табаны иитэр “Турукан» общинаҕа төрөппүттэригэр көмөлөһөр. Төрүт дьарыгы этигэр-хааныгар илдьэ сылдьар уол табалары көрөн, хаһаайыстыба үлэтин улахан дьоннуун тэҥҥэ үллэстэн үлэлээн, сайынын ыстаадаҕа атаарар. Булчут хаана тардан, тыа хаһаайыстыбатыгар элбэх хоромньуну оҥорор бөрө кыылы бултааһыҥҥа аҕа көлүөнэттэн уопут ылар. Хаһаайыстыба кэлиҥҥи үс сылга 15 бөрөнү бултаабыт.
«Бу күрэскэ бастаан 2024 сыллаахха кыттыбыппыт, онно кыттан “Бастыҥ эдэр табаһыт” номинацияҕа 1 истиэпэннээх диплому уолум ылбыта. Күрэс туһунан убайбыт Владислав Васильевич Колесов сырдатан, балаһыанньатын ыыппыта, ону көрөөт тута слайдабытын оҥорон ыыппыппыт.
Быйыл кыттыыны ыларбытыгар презентацияны таҥан оҥорууга Николай Николаевич Никитин уонна оскуолабыт дириэктэрэ Таисия Васильевна Кейметинова көмөлөспүттэрэ. Кинилэргэ ис сүрэхпититтэн махтанабыт.
Бу маннык күрэстэр буолаллара олус үчүгэй! Үүнэн эрэр көлүөнэ эбээлэрин, эһээлэрин үлэлэрин үөрэтэргэ, утумнаан хаалларбыт сүөһүлэрин иитиигэ оҕо кыра эрдэҕиттэн сыстыгас буолар,” – диэн Давид күн күбэй ийэтэ Галина Николаевна үөрүүтүн үллэһиннэ.
Эбээн-Бытантайга табаны иитии устуоруйата былыргы быдан дьыллартан саҕаланар. Оччоттон баччааҥҥа дылы уустуктары аахсыбакка төрүт дьарык өрө тутуллан, көлүөнэттэн көлүөнэҕэ бэриллэн, билиҥҥи сайдыылаах үйэҕэ эдэр ыччат өбүгэтин үгэһигэр ылсара олус хайҕаллаах!
Кыайыылаах уолбут Давид Другин күрэскэ кыттыбыт презентация үлэтин, харах үөрэр кэрэ хаартыскаларын биһиги телеграмм-ханаалбытыгар бу ссылканан киирэн көрүҥ, сэргээҥ: https://t.me/bytantayuottara/21350?single
Сардаана Копырина