Ааспыт нэдиэлэҕэ СӨ Ситэриилээх былааһын бөлөҕө Дьарҕаалаахха үлэлээтэ. Дмитрий Садовников салайааччылаах бөлөх кытыы нэһилиэк олохтоохторун кытары көрсөн, олохтоохтор санааларын иһиттэ.
Мунньахха төрөппүттэр, нэһилиэк олохтоохторун ааттарыттан Клара Стручкова-Захарова саҥа оскуола тутуутун туруоруста. Оскуола 4 дьиэнэн үлэлии турарын, бары дьиэлэр олус эргэрэн ирдэбилгэ эппиэттээбэттэрин, хаарбах туруктаахтарын туһунан эттэ. Хотугу нэһилиэк оҕолоро аныгы кэми кытта тэҥҥэ хаардыылаан, хаачыстыбалаах үөрэҕи ылыылара сүрүн сорук буоларын, үрдүкү кылаас оҕолоро эксээмэни, түмүктүүр аттестацияны улуус киинигэр туттара баралларын, уйулҕа да, үп-харчы да өттүнэн уустуктары көрсөллөрүн туһунан эттэ уонна нэһилиэк олохтоохторо илии баттааһыннаах туруорсуу суруктарын туттарда.
Маны таһынан Клара Николаевна уруккута “Якутопторг”, онтон билиҥҥитэ АТЛК (“Арктическай торгово-логистическай компания”) аһы-үөлү, бородууктаны тиэйиигэ консигнатордартан 30 бырыһыан харчынан утары үбүлээһини көрдүүр саҥа усулуобуйалааҕын, ол усулуобуйа хотугу нэһилиэккэ хайдах да сөп түбэспэтин туһунан эттэ. Маныаха Бырабыыталыстыба бөлөҕө хотугу оройуоннартан бу кыһалҕаҕа үгүс этии киирэринэн, боротокуолга киллэрэн, үлэлэһиэхпит диэн хоруйдаатылар.
Кэтэх хаһаайыстыбалаах Матрена Баишева сир-уот, чуолаан ходуһалары докумуоннатарга көрсөр кыһалҕалары, сүөһүнү чииптээһин туһунан ыйытыктары биэрдэ. Маны таһынан олохтоохтору суол-иис, малай авиация боппуруостара долгутара көһүннэ.
Сити курдук, Дмитрий Садовников салайааччылаах бөлөх олохтоохтору кытары көрүстэ, ону тэҥэ нэһилиэк тэрилтэлэригэр сылдьан үлэни- хамнаһы билистилэр.
Сардаана Копырина