IV Табаһыттар өрөспүүбүлүкэтээҕи сийиэстэригэр кытта, улуус дэлэгээссийэтэ айаҥҥа турунна.
Анал таһаҕас тиэйэр көтөр аалынан өрөспүүбүлүкэтээҕи сүлүөккэ 10 чулуу табаһыт уонна 18 кынаттаах табалар халлаан суолунан 641 килэмиэтири дабайан, улууспут чиэһин көмүскүү көттүлэр.
Санатан эттэххэ, 2013 сыллаахха таба салаатын биллиилээх үлэһитэ И.К.Спиридонов 100 сааһыгар анаммыт өрөспүүбүлүкэтээҕи сүлүөккэ, улууска тыа хаһаайыстыбатын сайдыытыгар дьоһун суолун хаалларбыт, үгүс кылаатын киллэрбит А.Д.Бочкарев эдэр табаһыттар хамаандаларын тэрийэн илдьибитэ. 10 табалаах барбыт дьоммут, 19 хамаанданы кэннилэригэр хаалларан, Аан дойду чөмпүйүөннэрэ үрдүк ааты сүгэн, өтөрүнэн буолбатах кыайыыны – хотууну ситиспиттэрэ, «Урал – вахтовка” массыына, буран тиэхиньикэлэр сыаналаах бириистэрдээх үөрүү көтөллөөх кэлбиттэрэ.
Онтон 2017 сыллаахха, Бүтүн Арассыыйатааҕы табаһыттар IV сийиэстэригэр спорт хотугу көрүҥнэригэр биһиги улууспут уонна Томпо улууһун хамаандалара Саха сирин аатын көмүскээбиттэрэ. Манна 12 таба уонна 6 табаһыт эмиэ көтөр аалынан өрөспүүбүлүкэ киинигэр тиийбиттэрэ. Эбээн Бытантай хамаандата бу улахан таһымнаах күрэхтэһиигэ I бочуоттаах миэстэни ситиһэн, кыайыы өрөгөйүн билбитэ, Арассыыйа чөмпүйүөннэрэ үрдүк ааты ылбыта, «Уаз-фургон” сүрүн бириис хаһаайына буолбуттара.
Онон, бу да сырыыга дьоммут улууспут чиэһин дьоһуннук көмүскүөхтэрэ, сырыылара саргылаах, айаннара аартыктаах буоллун, диэн алгыыбыт, эрэнэбит!
Яна Рожина