Эбээн-Бытантай улууһугар «Хаарбах дьиэттэн дьону көһөрүү» бырагырааманан 12 кыбартыыралаах икки этээстээх олорор дьиэ тутуута бара турар. Саҥа дьиэни быйыл үлэҕэ киллэриэхпит диэн былаанныыллар.
Саҥа дьиэҕэ хаарбах туруктаах дьиэлэр олохтоохторо киирэллэрэ биллибитэ. Тутуу бэдэрээччитинэн ООО “СахаСтройКонтроль” үлэлиир. Тэрилтэ үлэтин туһунан сиһилии салайааччы Николай Аксентьев кэпсииригэр көрдөстүбүт.
— «Биһиги тэрилтэбит аата ООО “СахаСтройКонтроль” диэн, тутуу эйгэтигэр үлэлээбиппит номнуо 14 сылтан таҕыста. Араас улууска дьиэ тутуутун сакааһыгар үлэлиибит, холобур, Намҥа 4 кыбартыыралаах таас дьиэлэри туттарбыппыт, сакаас киирдэҕинэ анал тутууга сыһыаннаах дьону наймылаһан үлэлэтэбит, онон тутааччыларбыт уларыйа сылдьаллар.
Билигин Саккырыырга 12 кыбартыыралаах дьиэ тутуутугар 6 киһини үлэлэтэ ыыппыппыт, бу дьоммут сотору бүтэн кэлиэхтээхтэр, үлэлэрин салгыы атын биригээдэ тутар, былаан быһыытынан алтынньы ый бүтүүтэ үлэлэрин түмүктээн туттарыахтара. Саҥа дьиэ МХМ панель диэн бэлэм мас дуоскаларынан оҥоһуллан эрэр, маннык дьиэлэри Бэс Күөлгэ туппуппут этэҥҥэ 3-с сылыгар баран эрэллэр.
12-лээх дьиэ кыбартыыраларын кв. м. хаарбах дьиэлэриттэн улахан уларыйыыта суох буолуо, 10% арыый улахан буолуон сөп, онтон улааппат.»
