Биир дойдулаахпыт Дмитрий Васильевич Колесов — Бытантай Бытархайа оһуохай этиитинэн дьарыгыран, үгүс ыһыахтарга кыттан, «Саха сирин үтүөлээх этээччитэ» үрдүк ааты сүктэ! Үөрүү өрөгөйүн билбит биир дойдулаахпыт хотугулуу тардыылаах, бытантайдыы доҕуһуоллаах оһуохайа Улуу Туймаада хочотугар дуораһыйда.
Сиһилии балтыта Венера Колесова-Чаҕылхай сырдатта:
- Эбээн Бытантай улууһуттан төрүттээх, Акындьа кинээс хос сиэнэ Баһычча Баһылай кыра кыыһын Бороскуон улахан уола Колесов Дмитрий Васильевич оһуохайынан дьарыгырыыта алта сыл анараа өттүгэр саҕаламмыта. Охонооһой Дьөгүөрэп оһуохайга үөрэн диэҕиттэн ыла Уһуйааччы Сэмэн уола Миитэрэйи булан биэс ый курдук уһуллубут. Онтон «ковид” дьаҥа саҕаланан икки сыл тохтоон хаалан, «хаарыан сылларым таах халбыттара» — диир. Онон төрдүс сылын оһуохайынан дьарыгыран туран эппит. Бу сылларга Айылханнарга сылдьан, оһуохай этиитин араас албастарын үөрэтэн, сылын аайы ыһыахха кыттан, бу дьэ «Саха сирин үтүөлээх этэччитэ» үрдүк аат иҥэриллэн, үөрүү өрөгөйүн билэн, 162-с нүөмэрдээх туоһу дастабырыанньа туттарылынна. Бу үрдүк ситиһиитинэн биир дойдулаахтарын эҕэрдэлэрин тутан истиҥ махталын биллэрэр!
Убайым Дмитрий Васильевич Үөһээ Бүлүүгэ ыытыллыбыт Олоҥхо ыһыаҕар, Сунтаарга Кыыл Уолун бэстибээлигэр призер, киин куорат ыһыахтарыгар хаста да кыттан илии тутуурдаах, билигин дойду оҥостон олорор Күөх Ньурбатыгар биир актыыбынай оһуохайы көҕүлээччи буолар. Бытантай Бытархайа диэн ааттанан-суолланан көхтөөхтүк Бүлүүлүү матыыптаан этээччи быһыытынан биллэр. Бэйэтин тылыгар дьааҥылыы, аммалыы, бүлүүлүү да этитэлиир.