Тоҕус ый устата үөрэххэ умса түһэ үөрэнэн сылайбыт оҕолорбут сайыҥҥы сынньалаҥнарын хайдах, ханна атааралларын туһунан төрөппүттэр эрдэттэн бэлэмнэнэр, толкуйданар буолуохтаахтар.
Сайыҥҥы сылаас кэмнэргэ, биллэн туран, ханнык да оҕо дьиэ иһигэр сытар санаата суох, онон, оҕолор тугу да гыналлара суох уулуссаннан, дьиэннэн бириэмэлэрин халтайга ыыппаттарын туһугар аналлаах лааҕырдар үлэлииллэр. Быйыл биһиги улууспут оҕолоругар ханна, хайдах хайысхалаах лааҕырдар баалларын туһунан билээри тустаах дьону кытта кэпсэттибит.
«Бу үөрэх дьылыгар олунньу ыйтан саҕалаан сайыҥҥы оҕо сынньалаҥ лааҕырдарыгар күүстээх бэлэмнэнии саҕаланан, бэс ыйын 3 күнүттэн 3 күнүскү лааҕыр 110 оҕоҕо аанын арыйан үлэтин саҕалаабыта. Бүгүҥҥү күн туругунан эттэххэ, бу лааҕырдарбыт 100% хабыллан тураллар, манна бастакы уочарат социальнай чэпчэтиилээх оҕолор хапсаллар. Лааҕырдарбыт араас хайысханнан үлэлииллэр, ол эбэтэр — социально-педагогическай, уруһуй, спортивнай.
Оҕо саас киинигэр от ыйыттан социальнай-педагогическай „Проект Бипту” уонна „Выделка шкуры” диэн икки хайысханнан сайыҥҥы оскуола үлэлиэҕэ, 35 оҕону ылаллар. Онтон атырдьах ыйыттан оҕо спортивнай оскуолатыгар 15 оҕоҕо спортивнай куруһуоктар ыытыллыахтара.
Маны таһынан, от ыйыгар, атырдьах ыйыгар оскуолаҕа кылгас бириэмэлээх куруһуоктар арыллыахтара, онно улуустан 120 оҕо сылдьыан сөп.
Улуус тас өттүнээҕи лааҕырдар тустарынан этэр буоллахха, быйыл биһиги оҕолорбут Бэс Чагдаҕа уонна Сочига, Краснодарскай кыраайга ДОЛ „Юбилейный”, ДОЛ „Созвездие” диэн лааҕырдарга барыахтара, манна анал байыаннай дьайыыга сылдьааччылар уонна арктическай улуустар оҕолоро киирсэллэр,”— диэн үөрэҕирии салайааччытын солбуйааччыта Марианна Стручкова сырдатта.
“Сыл аайы Үлэлээх буолуу киинин кытта кыттыһан “Волонтер» диэн оҕолору хамнастаан Түгэһиир нэһилиэгин хомуйтарар үлэни ыытабыт. Быйыл үлэҕэ үөрэтэр лааҕырбыт бэс ыйын 10 чыыһылатыттан саҕаланар, манна 14 саастарыттан 17-гэр диэри 16 оҕону ыллыбыт. Сүрүн үлэлэрэ нэһилиэк сыыһын ыраастааһын буолар. Күнүс 14:00 чаастан 18:00 чааска диэри үлэлииллэр. Хамнастарын үлэлээх буолуу киинин кытта аҥардаан төлүүбүт, биһигиттэн 7000 буолар, уопсай сууммата 13 тыһ. 276.75 солк. холбоон буолар,” – диэн Түгэһиир нэһилиэгин баһылыгын солбуйааччыта Дмитрий Сыроватский кэпсээтэ.
«Быйылгыттан волонтердуу киирэр оҕолортон, бастатан туран, «Госуслуги” порталга учуотунай сурутуулаах буолаллара ирдэнэр. Үлэлээх буолуу киинэ 2022 сылтан ЕЦП(единая цифровая платформа ) бырагыраамманнан үлэлиибит, туох баар оҥорор өҥөбүт барыта манан ааһар, учуокка туруон баҕалаахтар бу бырагыраамманнан биэрэллэр. Урукку курдук кумааҕыннан тугу да ылбаппыт. Ол иһин оҕолору эмиэ бу бырагырааммаҕа ирдэнэр оҥордулар, сүрүн ирдэбилэ “Госуслуги” порталга бигэргэммит учуотунай суруга баар буолуохтаах.
Волонтер оҕолорго биһиги 6 тыһ. 276.75 солкуобайы төлүүбүт.
Маны таһынан табаһыт оҕолорбут барыахтаахтар, ол эрэн хаһан бараллара бу диэн биллэ илик, ону быһааран этэллэрин күүтэ сылдьабыт. Быйыл 6 оҕо үлэлии бараары сылдьаллар, үлэлэрэ 1 ый буолар, үлэлээх буолуу киинигэр учуокка турар дьоннортон 4 табаһыт төлөбүрдээх үлэҕэ барыахтаахтар оҕолору кытары,” – диэн үлэлээх буолуу киинин сүрүн исписэлииһэ Майя Охлопкова сырдатта.
Оҕолорбут барахсаттар быйыл сынньалаҥнара табылыннын, оҕо саас чаҕылхай кэмэ буолан, умнуллубаттык аастын!
Марианна СЛЕПЦОВА