Балаҕан ыйын 1 күнэ – Билии күнэ өрөбүлгэ түбэһэн, оскуолабыт аана бүгүн арылынна.
Билии күнүн бэлиэ тэрээһинэ оскуола спорт саалатыгар буолла, тэрээһини Мария Афанасьева уонна Николай Суханов иилээн-саҕалаан ыыттылар.

 
Оҕо уһуйаанын бүтэрэн, бастакы кылаас буолбут оҕолорбут киэргэнэн-симэнэн кэлэннэр чугдаарар куоластарынан хоһоон этэн киэргэттилэр.
Кинилэргэ эҕэрдэ тылларын уонна сэмэй бэлэхтэрин ууннулар улуус баһылыга Иннокентий Стручков, нэһилиэк баһылыга Сергей Аликов, үөрэх салалтатын салайааччыта Петр Потапов, ОДьКХ салайааччыта Максим Горохов, оҕо уһуйаанын сэбиэдиссэйэ Марина Верховская.
“Р.И. Шадрин аатынан Саккырыыр орто оскуолатыгар быйылгы үөрэх дьылыгар 276 оҕо үөрэниэҕэ. Быйыл 1 кылааска 19 киһи сайабылыанньа биэрдэ. Оҕолор былырыын курдук 2 симиэнэнэн үөрэниэхтэрэ.
Хаадырынан хааччыллыы туһунан эттэххэ, толорубут. Саҥа учууталлар Алтайскай кыраайтан биолог Светлана Валерьевна Бактушина кэлбитэ. Кини кэргэнэ, географ Аржан Борисович Бактушин, нуучча тылын уонна литературатын учуутала Ольга Борисовна кэлиэхтээхтэр”, — диэн оскуола дириэктэрин солбуйааччыта Хаарчаана Горохова сырдатта.

 

Марианна СЛЕПЦОВА