Бүгүн улуус дьаһалтатын дьиэтигэр ааспыт быыбардар түмүктэринэн Эбээн-Бытантай улууһун баһылыгынан талыллыбыт Иннокентий Стручковка уонна оройуон Сэбиэтин дьокутааттарыгар туоһулуур дастабырыанньалары үөрүүлээх быһыыга-майгыга туттардылар.
Территориальнай быыбардыыр хамыыһыйа бэрэссэдээтэлэ Мария Степанова саҥа талыллыбыт баһылыгы уонна дьокутааттары итиитик-истиҥник эҕэрдэлээтэ итиэннэ 113, 114, 116№-дээх быыбарбыыр хамыыһыйа бигэргэтэр быһаарыыларын ааҕан иһитиннэрдэ.
Ол курдук, “Эбээн-Бытантай национальнай улууһа” муниципальнай оройуон баһылыгынан талыллыбыт Иннокентий Стручковка дохсун ытыс тыаһын доҕуһуолунан аналлаах дастабырыанньа туттарылынна.
“Эбээн-Бытантай национальнай улууһа” муниципальнай оройуон дьокутааттарын Сэбиэтин үс мандаттаах мажоритарнай элбэх мандаттаах быыбардыыр уокуругун 8-с созывын дьокутааттарынан талыллыбыт Виктор Гороховка, Анастасия Архиповаҕа, Наталья Дмитриеваҕа, биир кэлим пропорциональнай быыбардыыр уокуругун 8-с созывын дьокутааттарыгар Иннокентий Аммосовка, Матрена Баишеваҕа, Матрена Гороховаҕа, Сергей Ивановка, Альбина Колесоваҕа, Надежда Колесоваҕа, Анна Мохчогороваҕа, Сергей Поповка, Степан Слепцовка, Акулина Сотрудниковаҕа, Иннокентий Старостиҥҥа, Надежда Старостинаҕа аналлаах дастабырыанньалары туттарыы долгутуулаах түгэн буолла.
Улуус баһылыга Иннокентий Стручков саҥа талыллыбыт оройуон Сэбиэтин дьокутааттарын тус бэйэтин аатыттан эҕэрдэлээтэ. «Салгыы төрөөбүт улууспут, дьоммут-сэргэбит туһугар бары бииргэ үлэлэһиэхпит, бастакы сиэссийэбитин хаһан ыытарбытын быһаарыахпыт, ол кэнниттэн оройуон Сэбиэтин дьокутааттарын бэрэссэдээтэлин, солбуйааччытын, сэкэритээрин талыыга үлэлэһиэхпит», — диэн эттэ.