Руслан Николаевич Аммосовы улууспут дьоно – сэргэтэ бэрт диэн сылаастык ахталлар. Руслан Николаевич 2005 сыллаахха норуот итэҕэлин ылан, Түгэһиир нэһилиэгин баһылыгынан талыллыбыта. Сити курдук, кини үс төгүл быыбарданан 2017 сыллаахха диэри сүрдээх таһаарыылаахтык үлэлээбитэ.
Бэйэтэ Адыаччыттан төрүттээх эрээри, Эбээн Бытантай национальнай улууһун иккис дойду оҥостон, табыллан олорбута, үлэни өрө туппута. Учуутал идэлээх буолан, дьону кытта биир тылы дэбигистик булара, эдэрдиин да, эмэнниин да тапсара.
Бу күннэргэ Руслан Николаевич улууспут баһылыгын Иннокентий Стручковы көрсөн, дойдум биир эмэ кэнчээритигэр саргылаах Саҥа Дьылынан эҕэрдэлээн, үтүө киһи буоларыгар баҕарарын этэн туран, кини аатыттан харчылаах кэмбиэри туттарарыгар көрдөстө.
Бүгүн, Иннокентий Николаевич баай уопуттаах, мындыр толкуйдаах урукку баһылык көрдөһүүтүн алы гыммакка, соҕотох аҕа Михаил Кривошапкин кырачаан кыысчааныгар Лейлаҕа бэлэҕи үөрүүлээх быһыыга туттарда. Маны тэҥэ улуус баһылыга Иннокентий Стручков дьаһалта аатыттан уонна улуустааҕы социальнай харалта салайааччыта Аэлита Сыроватская социальнай пуонда эрэгийиэннээҕи салаатын аатыттан минньигэс бэлэхтэри туттаран, кырачаан Лейлаҕа үөрүүнү бэлэхтээтилэр.
Яна Рожина