Эбээн-Бытантай улууһугар баһаарынай-тиэхиниичэскэй хамыыһыйа, дьаһалта, социальнай харалта, баһаарынай сулууспа үлэһиттэрэ баһаартан сэрэтэр аахсыйаҕа кыттыһан, элбэх оҕолоох дьиэ кэргэттэргэ, социальнай көмүскэлэ суох гражданнарга автономнай баһаартан сэрэтэр тэрили (АДПИ) босхо туруоран биэрдилэр.
АДПИ (автономный дымовой пожарный извещатель) кыра да буруо сытыгар утуйа сытар киһини уһугуннарар гына улаханнык тыаһаан биллэрэр, онон иэдээн тахсарыттан сэрэтэр, киһи олоҕун быыһыыр аналлаах.
“Саха Өрөспүүбүлүкэтин ыксаллаах быһыы-майгы министиэристибэтин Эбээн-Бытантай оройуонун кэтиир уонна сэрэтии үлэтин ыытар отделенията санатар!
Баһаар дьон сэрэҕэ суоҕуттан үксүн тахсарын өйдүүргүтүгэр, табах тардан баран мээнэ быраҕыы, бөҕү уматыы, уоту-күөһү көрүүтэ-истиитэ суох хаалларыы барыта баһаарга тиэрдэрин санатабыт.
Олорор дьиэлэргэ, биллэн туран, эппиэтинэс хаһаайыттарга сүктэриллэрин умнуо суохтаахпыт. Кинилэр баһаартан сэрэхтээх буолуу быраабылатын, ирдэбиллэрин тутуһан дьиэлэрин-уоттарын көрүнүөхтээхтэр. Оттуллар оһохтоох ыаллар оһоххут билиитэтэ бүтүн, хайдыыта суох буолуохтаах, оһох иннигэр ылтаһын хайаан да баар буолуохтаах. Оһох таһыгар маһы кыстаамаҥ, бөҕү-сыыһы кутумаҥ. Оттуллан турар оһоҕу быраҕан барымаҥ. Кыра оҕолору көрүүтэ-истиитэ суох дьиэҕэ хаалларымаҥ. Оҕо илиитэ тиийэр сиригэр, көстөр сиргэ испиискэни уурумаҥ. Уот — оҕо оонньуута буолбатаҕын өйдөтүҥ.
Дьиэҕэ баһаартан сэрэхтээх буоларга уонна баһаар тахсар кэмигэр суһал көмөнү оҥорорго хас биирдии ыалга баһаарынай тэрил (АДПИ) туруораргытыгар ыҥырабын.
АДПИ – автономнай баһаары сэрэтэр тэрил кыра да буруо сытыгар улахан тыас таһааран дьону сэрэтэр. Оннооҕор түүн ортото тыаһаан дьону уһугуннаран иэдээн тахсарыттан сэрэтэр аналлаах. Хас биирдии ыал дьиэтигэр маннык тэрил баар буолуохтаах.
Бэйэҕитин уонна дьоҥҥутун харыстыы сылдьыҥ, сэрэхтээх буолуҥ!» — диэн Саха Өрөспүүбүлүкэтин ыксаллаах быһыы-майгы министиэристибэтин Эбээн-Бытантай оройуонун кэтиир уонна сэрэтии үлэтин ыытар отделениятын быстах кэмҥэ эбээһинэһин толорор начальнига Дыгын Зырянов ыҥырда.
Сардаана Копырина