Бүгүҥҥү күҥҥэ Саха сиригэр номнуо 138 араас баһаардар буоллулар, мантан 16-та олорор дьиэлэргэ.
Манна 6 киһи суорума суолланна, онтон биирэ оҕо. Сыл маҥнайгы эрэ ыйа бүттэ эрээри, хомойуох иһин, баһаар сыыппарата киһини дьиксиннэрэр.
Баһаары сэрэтэр үлэ былааннанан ыытыллар. Бу күннэргэ бары нэһилиэнньэлээх пууннарга «Безопасный гараж” аахсыйа ыытылынна. Эбээн Бытантай улууһугар баһаары сэрэтэр үлэҕэ инструктор Виктор Ефимов тиһиктээхтик ылсан үлэлиир. Виктор Егорович улуус киинигэр гаражтары кэрийэ сылдьан уоттан сэрэхтээх буолуу туһунан кэпсээтэ, ыстыраап миэрэлэрин билиһиннэрдэ.
- Өрөспүүбүлүкэҕэ уоттан күннэтэ араас түбэлтэлэр тахсаллар. Биһиги үлэбит сүрүнэ – нэһилиэнньэни баһаартан сэрэтии үлэтэ буолар. Билиҥҥи кэмҥэ, тохсунньу 20 – тэн олунньу 20 күнүгэр диэри, «Безопасный гараж» аахсыйа өрөспүүбүлүкэ үрдүнэн ыытыллар. Бу чэрчитинэн биһиги Баатаҕай Алыытыгар чааһынай уонна тэрилтэлэр гаражтарын көрдүбүт. Тэрилтэлэр гаражтарын көрөн бүттүбүт, суоппардарга мэхээньиктэргэ бэсиэдэлэри ыыттыбыт. Сүрүн сыыһаларынан, гаражка бөҕү-сыыһы мунньуу буолар. Ол эбэтэр, ханнык да гаражка бөх-сыыс, туттуллар тэрээпкэлэр анаммыт сиригэр туруохтаах, күн аайы тоҕуллуохтаах. Маны тэҥэ, гаражка 20 л. ордук уматыгы (бэнсиин, сэлээркэ уо.д.а.) тутар бобуллар. Биир сүрүн кэһиинэн, гаражтарга уот тардыллыыта буолар. Манна уот ситимэ булгуччу анал проводынан тардыллыбыт, кабельлаах буолуохтаах. Оһох булгуччу собуот гиэнэ буолара ирдэнэр. Биһиэхэ, ордук чааһынайдарга үксүн кэриэтэ оҥоһуу оһохтор тураллар. Оһохтор собуот сэртипикээттээх буолуохтаахтар, бу докумуон гаражка баара ирдэнэр. Маны таһынан, ититэр тэриллэри туттуу төрүт бобуллар. Манна ордук чааһынайдар, араас ититэр тэриллэри тутталлара баар суол. Огнетушитель эмиэ, чааһынайдарга да, тэрилтэлэр да гаражтарыгар булгуччу баар буолуохтаах. Манна эбии уоту тутатына умуруорар матырыйааллар. Кэлиҥҥи кэмҥэ гаражтары дьиэҕэ сыста тутар буоллулар. Манна эмиэ ирдэбиллэр бааллар. Ол курдук, гараж уонна дьиэ ситимнэнэр истиэнэтэ булгуччу анал матырыйаалынан бүрүөһүннээх буолуохтаах, маһа проивопожарнай пропитканан сотуллуохтаах. Баһаар тахсыытын таһаарбыт киһи 5000 солк. ыстырааптан саҕалаан холуобунай эппиэтинэскэ диэри тардыллар. Көрөргүт курдук, миэрэ кытаанах. Инникитин, нэһилиэктэргэ эмиэ сылдьан сэрэтэр үлэни ыытыахпыт.
Уопсайынан эттэххэ, быраабыланы тутуһуу эһигини уоттан сэрэтэр. Бу барыта Арассыыйа “Правила противопожарного режима” сокуонугар олоҕурар.