Кэккэ сылларга Арктика улуустарыгар атыы – эргиэн кииннэрин тутуу тиһиктээхтик ыытыллар. Маннык эбийиэктэр хоту сир олохтоохторо төгүрүк сыл оҕуруот аһынан-үөлүнэн хааччыллыыларыгар туһаайыллар. Эбээн Бытантай улууһун киинигэр киин тутуллар, 2025 сылга үлэҕэ киириэхтээх.
Ааспыт кыһын тутуу матырыйаала тиэллэн сайыҥҥы кэмҥэ суолталаах эбийиэк тутуута саҕаланна. Эбийиэк 530,80 кв.м. иэннээх, иһигэр 60,80 кв.м. атыылыыр саала, 101,40 кв.м. оҕуруот аһын харайар ыскылаат, 49,8 кв.м. холодильнай камералар, 297 кв.м. сылаас ыскылаат уонна 180 кв.м. иэннээх тымныы аһы харайар ыскылаат баар буолуохтара. Ас – үөл сөмөлүөтүнэн уонна кыһыҥҥы суолунан тиэллиэҕэ, — диэн Арктическай атыы – эргиэн хампаанньатын бэрэстэбиитэлэ кэпсиир.
Хоту сир олохтоохторо сүҥкэн суолталаах тутуу үлэҕэ киирэрин эрэнэ кэтэһэллэр. Тыйыс усулуобуйалаах сиргэ төгүрүк сыл хаачыстыбалаах, сибиэһэй аһынан хааччыллыы олох -дьаһах хаамыытын чэпчэтэрэ чахчы.