«Арктика десана» мобильнай быраастар биригээдэлэрэ уһук хоту сылдьан, олохтоохтор доруобуйаларын туругун чинчийиилэрэ көдьүүстээҕин бигэргэтэр.
Ол курдук, кэккэ сыллар усталарыгар Эбээн Бытантай улууһун олохтоохторо маннык биригээдэлэргэ миэстэтигэр көрдөрүнэр буолбуттарын бэрткэ хайҕыыллар. Быйыл, кытыы нэһилиэктэргэ тиис быраастара кэлэн икки нэдиэлэ устата үлэлээтилэр. Олохтоохтор махталлара муҥура суох. Бу туһунан Кустууртан биһиги уопсастыбаннай кэррэспэндьиэммит Тамара Шадрина суруйар.
— Чэгиэн буолуу төрдө, тииспит туругуттан саҕаланар. Хоту сиргэ, тыйыс усулуобуйаҕа тиис ыарыыта, алдьаныыта үгүс. Маныаха биһиэхэ тиис эмчиттэрэ, өрөспүүбүлүкэтээҕи киинтэн, анал туспа тиис биригээдэтэ кэлэн үлэлээн, үгүс киһини эмтээтилэр. Өҥө барыта босхо буолара хайҕаллаах. Биригээдэ салайааччыта, стоматолог Дарина Константиновна кэпсиир: «Кустуурга 4 исписэлиис нэдиэлэ кэриҥэ үлэлээтибит. Үлэлииргэ туох баар усулуобуйаны тэрийбиттэр. Олус үчүгэйдик көрсөн, аһатан, хоннорон Кустуур олохтоохторо дьиэлээбит хаһаайкаҕа чуолаан Туяра Васильевнаҕа махталбытын тиэрдэбит. Дьон үксэ тиистэрэ мөлтөх «глубокий кариес», оҕолор эмиэ кариестаахтар. Тиис туруга иһэр уубутуттан, гигиенаттан, астан барыта тутулуктаах. Оскуолаҕа оҕолорго сырдатар, сэрэтэр сүбэлиир үлэ барыан наада. Итиэннэ дьон эбии «Д» битэмиин, балык сыатын иһэллэригэр сүбэлиибит. Барыта 150 киһи тиис туурдарда, эмтэттэ. Доруобай буолуҥ, тиискитин харыстааҥ!»