Бырайыак сүрүн көҕүлээччитинэн СӨ доруобуйа харыстабылын министиэристибэтигэр билим уонна наука трансформациятыгар экспертэр сэбиэттэрин чилиэнэ Людмила Николаева буолар. Ыраах тайаан сытар, ыарахан суоллаах – иистээх, тыйыс усулуобуйалаах хоту сир кэрэ аҥардарыгар ордук туһалаах, тоҕоостоох бырайыак туһунан К.А.Серебрякова аатынан киин балыыһа гинеколог – бырааһа Эльза Горохова санаатын үллэстэр.
— Биһиги Бэрэсидьиэммит В.В. Путин 2024 с. «Дьиэ кэргэн» сылынан биллэрэн сыл иитинэн сүрдээх суолталаах, туһалаах үлэлэр былааннанылар. Онтон биирдэстэринэн «Ийэ доруобуйата» бырайыак буолар. Биһиги улууспутугар барыта 580 кыыс, дьахтар хабыллан көрдөрүнүөхтээхтэр. Балыыһабытыгар былырыын саҥа маммография аппаратын иэрбиттэрэ, онно түһэрэллэр. Бу бырайыагынан онколог быраастар чинчийии үлэтин номнуо ыытан саҕалаатылар. Бырайыак кыра куораттар, ыраах сытар уонна хоту улуустар, нэһилиэктэр уонна учаастактар олохтоохторун, 40-тан үөһээ саастаах дьахталлары хабар. Маҥнайгы түһүмэҕэр ыйытынньык ыытыы, иккиһинэн маммолог – онколог, онколог гинеколог чинчийии ыыталлар. Онколог быраастар эрдэ искэн тахсан эрэрин уонна баар буолбутун билэллэр. Сылтан сыл искэн ыарыы эдэримсийэн иһэр. Онон, хас биирдии кыыс, дьахтар аймах бэйэтин доруобуйатын көрүнэригэр, эппиэтинэстээхтик сыһыаннаһарыгар олус көмөлөөх бырайыак буолар.
