Бүгүн бары ватсапп статустарыгар устудьуоннуу сылдьыбыт кэрэ кэмнэрин, доҕотторун ахтан-санаан ылар күннэрэ үүннэ. Бу туох күнэй? диэн ыйытыкка, тохсунньу 25 күнэ “Татьянин день”- Арассыыйа устудьуоннарын күнэ.
Биһиги бу бэлиэ күҥҥэ биир бастыҥ, чаҕылхай, элбэх ситиһиилэринэн үөрдэр устудьуон кыыс туһунан кэпсиибит.
Лидия Стручкова – С.Ф. Гоголев аатынан Дьокуускайдааҕы педагогическай колледж, уһуйааччы идэтигэр үөрэнэр. Быйыл түмүктүүр 4 – с кууруһугар үөрэнэ сылдьар.
Бастакы куурустан үөрэҕэр туйгун, үөрэх сектора, ону таһынан араас тэрээһиннэргэ көхтөөх кыттыыны ылар.
НПК-ҕа олох кыра эрдэҕиттэн кыттыыны ылар, бу дьарыгын бырахпакка илдьэ сылдьар. Устудьуоннуу сылдьан кыттар тиэмэлэрэ үөрэҕин хайысхатынан кыра оҕону сайыннарар, үөрэтэр мультиктары ырытан, саастарынан улаатыннаран, эбэн, хас саастаах оҕоҕо ханнык барсарын көрөн-үөрэтэн, чинчийэн ол үлэлэрин көмүскээн барытыгар миэстэлэһэн, Арассыыйа таһымыгар элбэхтэ кыттыыны ылбыта. Быйыл курсовой үлэтигэр эбээннии моһуоннаах уруһуйдары оҕолорго үөрэтии туһунан көмүскээн үгүс сэҥээриини ылбыта.
Бу ситиһиилэрин барыта сыаналанан, Лидаҕа Арассыыйаҕа наука уонна үөрэхтээһин министиэристибэтин муус устар 28 күнүгэр 326 нүөмэрдээх бирикээһинэн Президент стипендият ананна. Маннык стипендияны үгүс устудьуонтан талан 10 киһиэхэ бэриллэр. Онон, биһиги кыыспыт үрдүк бириэмийэни ылааччылар ааттарыгар киирбитин олус диэн, бары үөрэ иһиттибит.
Лидия үөрэҕин кэннэ салҕыы үрдүк үөрэх кыһатыгар туттарсар былааннаах, кини өссө да элбэҕи, саҥаны билиэн-көрүөн, үөрэтиэн баҕарар буолан, бэйэтин сайыннарар сыаллаах бастыҥ устудьуон буолар.
Устудьуон доҕотторбутун барыларын бүгүҥҥү анал бырааһынньыккытынан эҕэрдэлиибит! Өссө да үрдүк ситиһиилэргитинэн дойдугут — Эбээн Бытантайы ааттата, туругурда туруҥ, диэн баҕа санаабытын этэбит.
Марианна СЛЕПЦОВА