И.Н. Слепцов аатынан Кустуур орто оскуолатын 9 кылааһын үөрэнээччитэ Алеша Старостин «Тыа сирин эдэр үлэһитэ-2025» өрөспүүбүлүкэтээҕи курэскэ «Бастыҥ эдэр табаһыт” номинацияҕа 3 миэстэни ылла. Табаны иитии салаатыгар оҕолорбут үлэлээн, үрдүк таһымнаах күрэстэргэ кыттан ситиһиилэнэллэрэ хас биирдиибит үөрүүтэ буолар.
Алёша 7 кылаастан саҕалаан «Мэрлэнкэ» (Ньургуьун) көс оскуолаҕа үөрэнэр. Ыстаадаҕа саас аайы оҕолору кытта үлэлии тахсар. Манна 7-тэн 15-гэр диэри саастаах үөрэнээччилэр көмөлөһө, үлэлии тахсаллар. Оҕолор уучах миинэ, табаны маныы, ыстаада олоҕор үөрэнэллэр. Саас таба төрүөҕэр сүҥкэн элбэх көмөнү оҥорсоллор. Оҕолор үлэни сыаналыыллар, кэлэктиипкэ үлэлии үөрэнэллэр.
Биһиги уолбут Алёша толлон турбакка үлэҕэ көхтөөхтүк көмөлөһөр. Өбүгэлэрбит илдьэ кэлбит табаларын салгыы көрсөр санаалаах. Алёша маны таһынан араас ыытыллар тэрээһиннэргэ, күрэхтэргэ барытыгар кыттар. Үгүс ситиһиилэрдээх.
«Биһиги ыстаадаҕа үлэлээн, таба ахсаанын харыстыырга эр киһи быһыытынан улахан эппиэтинэһи сүгэбит. Эйиигиттэн, эн хайдах үлэлииргиттэн олус элбэх тутулуктаах, эр киһи оруола манна сүҥкэн үрдүк. Ыстаадаҕа үлэлээн, хамнастанан, элбэх оҕолоох дьиэ кэргэммэр, бииргэ төрөөбүттэрбэр көмөлөһөрбүттэн үөрэбин. Мин бэйэм төрүт сирим хаһаайына, өбүгэбит үгэһин илдьэ сылдьааччы буолуохпун баҕарабын,» — диэн Алеша санаатын үллэстэр. 
Надежда Слепцова