Эбээн-Бытантай улууһугар култуура чэчирии сайдарын туһугар үтүө суобастаахтык, бэриниилээхтик үлэлии-хамсыы сылдьар биһиги биир дойдулаахпыт, «Гарпан” этнокултуурунай киин звукорежиссера Владислав Колесов Саха Өрөспүүбүлүкэтин тыа сирин култуура тэрилтэлэрин бастыҥ үлэһитэ буолла!
«Мин култуура эйгэтигэр аармыйа кэнниттэн, ол эбэтэр 1995-96 сс. үлэлээбитим. Ол иннинэ оскуола кэнниттэн оробуочайдаабытым уонна табалаабытым.
Онтон 1999 сылтан Дьокуускайдааҕы педагогическай училище (ЯПУ-2) музыкальнай салаатыгар үөрэммитим. Үөрэнэн кэлэн баран, алын сүһүөх оскуолаҕа учууталлаабытым уонна эбии кулуупка музыканнаабытым. Ол курдук, оскуолам кэнниттэн 2003-тэн 2010 сылга дылы улуустааҕы Оҕо саас киинигэр вокальнай устуудьуйа арыйан үлэлэппитим, ол быыһыгар эмиэ култуурабар үлэлии сылдьыбытым, тиһэҕин быспатаҕым. Онтон 2010 сылтан Оҕо саас кииниттэн бүтэммин, култуурам эйгэтигэр аккомпаниатор-баяниһынан толору киирбитим. Билигин даҕаны култуурабар звукорежиссер дуоһунаһыгар үлэлии сылдьабын. Онтон кэлэр 2025 сылтан режиссер ыстаапкатыгар киириэхтээхпин, былырыын Дьокуускай куоракка бара сылдьаммын анал куурустарга үөрэнэн кэлбитим.
Бу уһун сыллар устата үлэлээбит дьоммуттан күн бүгүҥҥэ диэри үтүө суобастаахтык, эҥкилэ суох үлэлии сылдьар кэллиэгэлэрбинэн Полина Пантелеймоновна Ефимова, Мария Ивановна Аммосова, Валерианна Иевна Максимова буолаллар, бары бииргэ эйэ-дэмнээхтик үлэлии сылдьарбытыттан үөрэбин. Бу үлэлиир кэмим тухары араас үлэһиттэри кытта алтыһан үлэлээбиппинэн дьоллоохпун дии саныыбын. Ол курдук, хореограбынан Василий Федорович Старостин, Изабелла Алексанровна Максимова, Евдокия Фрументьевна Оконешникова, худуоһунньугунан Иван Гаврильевич Жирков олус таһаарыылаахтык үлэлээбиттэрэ. Дириэктэрдэринэн мин бастаан үлэҕэ киирэрбэр Елена Николаевна Крылова этэ, кини кэнниттэн култуура салайааччытынан Лидия Софроновна Сыроватская, «Гарпан” дириэктэринэн Валерианна Иевна Максимова этилэр. Ол кэнниттэн кылгас кэм пандемия бириэмэтигэр Дария Васильевна Малышева уонна Щерзот Николаевич Рябчиков үлэлээбиттэрэ. Уонна анал байыаннай дьайыыга быстах хомуурга түбэһэн, Иван Семенович Горохов бэрткэ диэн үлэтин саҕалаан иһэн, сэрии толоонугар дьоруойдук охтубута. Билигин этнокултуурунай киини Раиса Дмитриевна Старостина салайан үлэлээбитэ сылтан орто, бэрткэ диэн таһаарыылаахтык үлэлии сылдьар.
Бу үлэлээбит, үлэлии сылдьар кэмнэрбин бэрткэ диэн үчүгэйдик саныыбын. Өссө даҕаны төрөөбүт улууспут, омукпут култуурата, фольклора, үтүө үгэстэрэ сайда турарыгар, эдэр көлүөнэ дьоҥҥо ырыа, үҥкүү кэрэ алыбын нөҥүө бэриллэн үйэлэр тухары хааларыгар таһаарыылаахтык үлэлиэхпит диэн бигэ эрэнэбин. Бары биир дойдулаахтарбын, истиҥник саныыр хас биирдии кэллиэгэлэрбин барыгытын кэлэн иһэр Саҥа Дьылынан итиитик-истиҥник ис сүрэхпиттэн эҕэрдэлиибин! Киһи үлэтэ таһаарыылаах, үтүө түмүктээх буолара бииргэ үлэлиир кэлэктиипкиттэн, кэллиэгэлэргин кытта истиҥ сыһыантан сааамай тутулуктаах. Эйиигин өйдүүр, өйүүр, бары биир киһи курдук сомоҕо буоллахха барыта табыллар, сатанар!” – диэн Владислав Васильевич санаатын үллэһиннэ.
Бэлиэтээн эттэххэ, Владислав Васильевич култуура эйгэтигэр эрэ буолбакка, олоххо-дьаһахха, чуолаан дьиэ кэргэн сыаннастарын өрө тутан, дьоһун олоҕу олорууга үтүө холобур буолар киһибит. Кэргэнэ Ньургуйаана Еремеевналыын улууска ыытыллар дьиэ кэргэн күрэхтэрин кыайыылаахтара, өрөспүүбүлүкэ таһымыгар тахсан эмиэ бэрткэ диэн ситиһиилэммиттэрэ. Бу соторутааҕыта Владислав Васильевич кэргэнинээн ыал буолан, сарын сарынтан өйөнсөн, эйэ-дэмнээхтик 25 сыл устата бииргэ олорбут урууларын – үрүҥ көмүс сыбаайбаларын бэлиэтээбиттэрэ.
Бу курдук үлэ киһитэ кэмигэр сыаналанан иһэрэ олус үчүгэй! Владислав Васильевичка үлэтигэр үрдүк ситиһиилэри, тус олоҕор дьолу-саргыны, чэгиэн доруобуйаны, или-эйэни баҕарабыт. Өссө да төрөөбүт улууспут чэчирии сайдарын туһугар таһаарыылаахтык үлэлээ диэн алгыыбыт.
Сардаана Копырина