Кииннэммит бибилэтиэкэ иһинэн литературнай түмсүү тиһиктээхтик үлэлиир.
Манна улууспут айар куттаахтара мустаннар араас тэрээһиннэри ыыталлар, көрсөн санаа атастаһаллар, айымньыларын ырыталлар.
Бу күннэргэ айар куттаахтар Кустуур бөһүөлэгэр ыалдьыттаатылар, бөлөҕү кииннэммит бибилэтиэкэ салайааччыта Лидия Сыроватская иилээтэ. “Саха суругунан литературата төрүттэммитэ 125 сылын көрсө кытыы нэһилиэкпитигэр, Аллараа Бытантайга «Литературнай десант” быһыытынан сырыттыбыт. Сүрдээх үчүгэйдик көрүстүлэр. Түгэнинэн туһанан, нэһилиэк көхтөөх ыччаттарыгар, “Аартык” бөлөххө, бибилэтиэкэ салаатын үлэһитигэр Мария Саргинаҕа, «Маранга» этнокултуурунай киин үлэһиттэригэр барҕа махталбын тиэрдэбин. Улахан махталбытын улууспут Аҕа баһылыгын солбуйааччытыгар Александра Ивановаҕа, массыынанан хааччыйан, сырыыбыт табыллан сүргэбит көтөҕүлүннэ».
Быйыл Сахабыт сиригэр суругунан литэрэтиирэбит төрүттэммитэ 125 сыла бэлиэтэнэр. Бу бэлиэ күн улуу саха суруйааччыта, бөлүһүөгэ, сырдатааччыта Алексей Кулаковскай — Өксөкүлээх Өлөксөй «Байанай алгыһа» поэманы суруйбута 1900 сылыттан ааҕыллар.
Яна РОЖИНА